নাৰকীয়: বিহাৰত দলৱদ্ধ বলাৎকাৰ কৰি সন্তানসহ মহিলাক দলিয়াই দিলে নদীত

উত্তৰ প্ৰদেশৰ হাথৰাছত এগৰাকী ১৯ বছৰীয়া দলিত সম্প্ৰদায়ৰ যুৱতীক বলাৎকাৰ কৰি মৃত্যুৰ মুখলৈ ঠেলি দিয়াৰ ঘটনাৰ প্ৰতিক্ৰিয়া চলি থকাৰ সময়তে  এইবাৰ বিহাৰতো সংঘটিত হৈছে আন এক দলৱদ্ধ বলাৎকাৰৰ ঘটনা।

বিহাৰৰ বক্সাৰ জিলাত কেইজনমান লোকে নিজৰ পাঁচ বছৰীয়া  পুত্ৰ সন্তানৰ সৈতে বেংকলৈ গৈ থকা অৱস্থাতে এগৰাকী মহিলাক অপহৰণ কৰি বলাৎকাৰ কৰে।

দুৰ্বৃত্তৰ দলটোৱে মহিলাগৰাকীক সন্তানসহ অপহৰণ কৰি এখন খেতি পথাৰলৈ লৈ যায় আৰু তাতেই সন্তানৰ সন্মুখতে মহিলাগৰাকীক বলাৎকাৰ কৰে ।

ইয়াৰ পিছত দুৰ্বৃত্তৰ দলটোৱে ঘটনাৰ চিন-মোকাম নোহোৱা কৰিবলৈ সন্তানৰ সৈতে মহিলাগৰাকীক একেলগে ৰছীৰে বান্ধি কাষৰে নৈ এখনত পেলাই দিয়ে।

নৈৰ কোৱাল সোঁতত উটি যোৱা মহিলাগৰাকীয়ে চিঞৰ-বাখৰ কৰাত নৈৰ কাষত বাস কৰা একাংশ লোকে শুনা পায়  আৰু মহিলাগৰাকীক সন্তানসহ উদ্ধাৰৰ ব্যৱস্থা কৰে।

স্থানীয় একাংশ সচেতন লোকৰ প্ৰচেষ্টাত মহিলাগৰাকীৰ প্ৰাণ ৰক্ষা পৰে যদিও পাঁচ বছৰীয়া সন্তানটিৰ মৃত্যু ঘটে।

পিছত মহিলাগৰাকীৰ ভাষ্যৰ ভিত্তিত আৰক্ষীয়ে এজন দুৰ্বৃত্তক কৰায়ত্ত কৰিবলৈ সক্ষম হয় যদিও বাকী নৰ পিশাচ কেইটা এতিয়াও পলাতক অৱস্থাতে থকা বুলি জানিব পৰা গৈছে।

আৰক্ষীয়ে পলাতক বলাৎকাৰী কেইটাৰ সন্ধানত অভিযান আৰম্ভ কৰিছে। এই ঘটনাই নিৰ্বাচনমুখী ৰাজ্য খনৰ মুখ্যমন্ত্ৰী নীতিশ কুমাৰক বাৰুকৈয়ে বিপাঙত পেলোৱা পৰিলক্ষিত হৈছে।

দিন দুপৰতে অপৰাধীয়ে সন্তানসহ মহিলাক অপহৰণ কৰি নি বলাৎকাৰ কৰাৰ ঘটনাকলৈ বিৰোধীয়ে নীতিশ কুমাৰৰ চৰকাৰক উভতি ধৰিছে।

বিৰোধীয়ে অভিযোগ কৰা অনুসৰি নীতিশ কুমাৰৰ শাসনত বিহাৰ এতিয়া ক্ৰমাৎ ধৰ্ষণৰ ৰাজধানীত পৰিণত হোৱাৰ উপক্ৰম ঘটিছে।