কৃষ্ণাইৰ যুৱ সাংস্কৃতিক কৰ্মী চিন্ময় নাথৰ পৰলোক : বিভিন্ন দল সংগঠনৰ শেষ শ্ৰদ্ধা জ্ঞাপন

গোৱালপাৰা জিলাৰ কৃষ্ণাই অঞ্চলৰ যুৱ সাংস্কৃতিক কৰ্মী চিন্ময় নাথ (৫৬)ৰ কালি গুৱাহাটী চিকিৎসা মহাবিদ্যালয় হাস্পতালত পৰলোকপ্ৰাপ্তি ঘটে৷উচ্চ ৰক্তচাপজনিত ৰোগত বিগত প্ৰায় এপষেক কাল ধৰি চিকিৎসালয়খনত চিকিৎসাধীন হৈ থকা চিন্ময় নাথে কালি আবেলি শেষ নিশ্বাস ত্যাগ কৰে৷

কৃষ্ণাইৰ প্ৰয়াত চিকিৎসক ডা° ৰমেশ চন্দ্ৰ নাথৰ কনিষ্ঠ পুত্ৰ চিন্ময় নাথ পেশাত এখন ফাৰ্মাচীৰ স্বত্বাধিকাৰী আছিল যদিও অঞ্চলটোৰ লগতে সমগ্ৰ জিলাখনতে তেওঁ পৰিচিত আছিল এজন সাংস্কৃতিক কৰ্মী ৰূপেহে৷ বিশেষকৈ গোৱালপৰীয়া লোকগীতক বিশ্ব দৰবাৰত প্ৰতিষ্ঠা কৰাৰ বাবে অহোপুৰুষাৰ্থ কৰা নাথে “অন দ্য ষ্ট্ৰীট” নামৰ এটা অনুষ্ঠানৰ জৰিয়তে নিজৰ অভিযান অব্যাহত ৰাখিছিল৷

নিজে সভাপতিৰ দায়িত্বত অধিষ্ঠিত চিন্ময় নাথে ‘অন দ্য ষ্ট্ৰীট’ৰ মজিয়াত গোৱালপৰীয়া লোক গীতৰ বিভিন্ন কৰ্মশালা, আলোচনা চক্ৰৰ আয়োজন কৰাৰ বিপৰীতে সমাজৰ পৰা হেৰাই যাব ধৰা থলুৱা বাদ্যযন্ত্ৰসমূহক নতুন প্ৰজন্মৰ সৈতে পৰিচয় কৰি দিয়াৰ বাবেও প্ৰচেষ্টা অব্যাহত ৰাখিছিল৷

চিন্ময় নাথ কৃষ্ণাই আঞ্চলিক ছাত্ৰ সন্থা, কৃষ্ণাই আঞ্চলিক ৰঙালী বিহু সন্মিলনী আদিকে ধৰি অঞ্চলটোৰ বিভিন্ন অনুষ্ঠান প্ৰতিষ্ঠানৰ সৈতে ওতঃপ্ৰোতভাৱে জড়িত আছিল৷

অতি নম্ৰ স্বভাৱৰ মৃদু ভাষী লোকজনৰ মৃত্যুৰ বাতৰি বিয়পি পৰাৰ লগে লগে সমগ্ৰ কৃষ্ণাই অঞ্চলতে শোকৰ ছাঁ বিয়পি পৰে৷

নাথৰ নশ্বৰ দেহ কালি নিশাই কৃষ্ণাই বজাৰস্থিত নিজ বাসভৱনলৈ লৈ অনা হয় যদিও আজি পুৱাহে শেষকৃত্য সম্পন্ন কৰা হয়৷

আজি পুৱা অন্তিম যাত্ৰা কালত প্ৰয়াত সাংস্কৃতিক কৰ্মীজনৰ প্ৰতি শেষ শ্ৰদ্ধা জ্ঞাপন কৰে কৃষ্ণাই প্ৰেছ ক্লাৱ, কৃষ্ণাই আঞ্চলিক ছাত্ৰ সন্থা, কৃষ্ণাই আঞ্চলিক আক্ৰাছু, কৃষ্ণাই আঞ্চলিক আমছু, গোৱালপাৰা জিলা সাহিত্য সভা,সাংবাদিক কৰ্ম পৰিষদ,অসমৰ গোৱালপাৰা জিলা সমিতিৰ লগতে অজস্ৰ গুণমুগ্ধই৷

চিন্ময় নাথে মৃত্যুৰ সময়ত পত্নী,একমাত্ৰ জীয়ৰী, ককায়েক বৌৱেক আৰু অলেখ আত্মীয় কুটুম্বক ইহ সংসাৰত এৰি থৈ যায়৷