বাক্সাত বিটিচিৰ নিৰ্বাচন অনুষ্ঠিত কৰা আৰু ৰাজ্যপালৰ শাসনৰ বাতিলৰ দাবীত টায়াৰ জ্বলাই প্ৰতিবাদ

বিটিচিত শীঘ্ৰে নিৰ্বাচন অনুষ্ঠিত কৰা আৰু ৰাজ্য পালৰ শাসন বাতিলৰ দাবীত তামুলপুৰৰ ৰাজপথত গণ সুৰক্ষা পাৰ্টি আৰু অবড়ো সুৰক্ষা সমিতিৰ টায়াৰ জ্বলাই তীব্ৰ প্ৰতিবাদ কৰে।

বিটিচিত শীঘ্ৰে নিৰ্বাচন অনুষ্ঠিত কৰা আৰু ৰাজ্যপালৰ শাসন বাতিল কৰাৰ দাবীত বুধবাৰে সন্ধিয়া গণ সুৰক্ষা পাৰ্টি আৰু অবড়ো সুৰক্ষা সমিতিয়ে তামুলপুৰৰ ৰাজপথ এক প্ৰতিবাদী কাৰ্যসূচী ৰূপায়ন কৰি তামুলপুৰ উত্তাল কৰি তোলে।

তামুলপুৰ জিলা অবড়ো সুৰক্ষা সমিতিৰ উদ্যোগত, গণ সুৰক্ষা পাৰ্টী আৰু তামুলপুৰ, দৰঙ্গাজুলি আৰু কাউৰবাহা অবড়ো সুৰক্ষা সমিতিৰ সহযোগত প্ৰতিবাদকাৰীসকলে তামুলপুৰৰ বৰনগৰত ৰঙিয়া-তামুলপুৰ-ভূটান ৰাষ্ট্ৰীয় ঘাইপথত টায়াৰ জ্বলাই আৰু চৰকাৰ বিৰোধী বিভিন্ন শ্লোগান দি তীব্ৰ প্ৰতিবাদ সাব্যস্ত কৰে।

প্ৰতিবাদকাৰীসকলে ‘বিটিআৰ আমি নামানো, বিটিআৰ বাতিল কৰক, ৰাজ্যপালৰ শাসন বাতিল কৰক, অসম চৰকাৰ হায় হায়, বিজেপি চৰকাৰ হুচিয়াৰ,  নৰেন্দ্ৰ মোদী লেই লেই ছেই ছেই, হিমন্ত বিশ্বশৰ্মা লেই লেই ছেই ছেই, সৰ্বানন্দ সোণোৱাল মুৰ্দাবাদ, অবড়ো সুৰক্ষা সমিতি জিন্দাবাদ গণ সুৰক্ষা পাৰ্টী জিন্দাবাদ আদি শ্লোগান দি উত্তাল কৰি তোলে ৰঙিয়া-তামুলপুৰ-ভূটান ৰাষ্ট্ৰীয় ঘাইপথ৷

এই প্ৰতিবাদী কাৰ্যসূচীত অবড়ো সুৰক্ষা সমিতিৰ কেন্দ্ৰীয় সম্পাদক ভাস্কৰ কলিতা, তামুলপুৰ জিলা অবড়ো সুৰক্ষা সমিতিৰ সভাপতি দুলাল পাটোৱাৰী, তামুলপুৰ জিলা অবড়ো সুৰক্ষা সমিতিৰ সাধাৰণ সম্পাদক মুকুট মহন্ত, তামুলপুৰ আঞ্চলিক অবড়ো সুৰক্ষা সমিতিৰ সম্পাদক বিনয় ডেকা, কাউৰবাহা আঞ্চলিক অবড়ো সুৰক্ষা সমিতিৰ সম্পাদক ধনজিৎ কলিতাকে ধৰি অবড়ো সুৰক্ষা সমিতি আৰু গণ সুৰক্ষা পাৰ্টীৰ শতাধিক নেতা কৰ্মী উপস্থিত থাকে।