ক্ষমতাৰ অংকৰে সতীৰ্থ ইমানুৱেল মুছাহাৰীসহ বিজেপিত যোগদান বিশ্বজিৎ দৈমাৰীৰ

দেওবাৰে(আজি) পুৱা ভাগত মুখ্যমন্ত্ৰী সৰ্বানন্দ সোণোৱালৰ বাসগৃহত বিপিএফ ত্যাগী ৰাজ্যসভাৰ প্ৰাক্তন সাংসদ বিশ্বজিৎ দৈমাৰীয়ে বিজেপিত যোগদান কৰে।

ৰাজ্যসভাৰ প্ৰাক্তন সাংসদ গৰাকীৰ সৈতে বিপিএফৰ প্ৰাক্তন সাধাৰণ সম্পাদক ইমানুৱেল মোছাহাৰীয়েও আজি বিজেপিত যোগদান কৰে।

তেওঁলোকক দুয়োকে দলৰ মজিয়ালৈ আদৰণি জনায় মুখ্যমন্ত্ৰী সৰ্বানন্দ সোণোৱাল, ৰাজ্যিক বিজেপিৰ সভাপতি ৰঞ্জিত দাস আৰু বিজেপিৰ ৰাষ্ট্ৰীয় সাধাৰণ সম্পাদক তথা সাংসদ দিলীপ শইকীয়াই।

ইফালে বিজেপিত যোগদান কৰিয়েই বিটিচিত এইবাৰ ৰাইজে পৰিৱৰ্তন আনিব বুলি দাবী কৰে দৈমাৰীয়ে।

ইয়াৰ পৰা ধাৰণা কৰা হৈছে যে আগন্তুক বিটিচি নিৰ্বাচনত বিজেপিয়ে এককভাৱে অৱতীৰ্ণ হৈ বিশ্বজিৎ দৈমাৰীৰ নেতৃত্বত পৰিষদ গঠনৰ বাবে আত্মবিশ্বাসী হৈ উঠিছে।

বিটিচিত এইবাৰ বিজেপিয়ে চৰকাৰ গঠন কৰিব বুলিও দাবী দৈমাৰীয়ে লগতে কয়ে যে সকলো জাতি, ধৰ্ম, জনগোষ্ঠীক একত্ৰিত কৰি সকলোৰে উন্নয়নৰ হকে বিজেপিয়ে কাম কৰি যাব।

বিপিএফৰ বহু বিয়াগোম নেতাই অতি শীঘ্ৰে বিজেপিত যোগদান কৰিব বুলিও এক ইংগিত দিয়ে দৈমাৰীয়ে।

উল্লেখযোগ্য যে, কালি ৰাজ্যসভাৰ সাংসদ পদৰ পৰা পদত্যাগ কৰিছিল দৈমাৰীয়ে। তেওঁ বিপিএফৰ কাৰ্যকৰী সভাপতি আছিল আৰু ইমানুৱেল মোছাহাৰী সাধাৰণ সম্পাদক পদত আছিল।