ইষ্ট বেংগলৰ বিৰুদ্ধে ৩ পইণ্ট সংগ্ৰহৰ লক্ষ্যৰে আজি খেলপথাৰত নামিব আত্মবিশ্বাসী নৰ্থ-ইষ্ট য়ুনাইটেড

ইণ্ডিয়ান চুপাৰ লীগত বিজয়ৰ লক্ষ্যৰে আজি এছ চি ইষ্ট বেংগলৰ বিৰুদ্ধে খেলপথাৰত অৱতীৰ্ণ হ’ব নৰ্থ-ইষ্ট য়ুনাইটেড।

সন্ধিয়া ৭.৩০ বজাত তিলক ময়দান ষ্টেডিয়ামত আই এছ এলৰ নতুন দল এছ চি ইষ্ট বেংগলৰ মুখামুখি হ’ব নৰ্থ-ইষ্ট য়ুনাইটেড।

চলিত আই এছ এলত বৰ্তমানলৈ নৰ্থ-ইষ্ট য়ুনাইটেড অপৰাজেয় হৈ আছে।

প্ৰখমখন খেলত নৰ্থ-ইষ্ট য়ুনাইটেডে শক্তিশালী মুম্বাই চিটি এফ চিক পৰাস্ত কৰি প্ৰতিযোগিতাত অভিযান আৰম্ভ কৰিছিল।

ইয়াৰ পৰৱৰ্তী দুখন খেলত কেৰালা ব্লাষ্টাৰ্ছ আৰু এছ চি গোৱাৰ বিপক্ষে ড্ৰ খেলি পইণ্ট ভগাই লৈছিল নৰ্থ-ইষ্ট য়ুনাইটেডে।

নৰ্থ-ইষ্ট য়ুনাইটেডে বৰ্তমানলৈ তিনিখন খেলত এখন বিজয় আৰু দুখনত ড্ৰ খেলি মুঠ ৫ পইণ্টেৰে পইণ্ট তালিকাৰ পঞ্চম স্থানত আছে।

আনহাতে, প্ৰথমবাৰৰ বাবে আই এছ এলত অংশলোৱা ইষ্ট বেংগলে বৰ্তমানলৈ দুখন খেলত অংশগ্ৰহণ কৰি দুয়োখন খেলত পৰাজয় বৰণ কৰিবলগীয়া হৈছে।

ইষ্টবেংগল দলে পইণ্ট তালিকাৰ অন্তিম স্থানত আছে।

নৰ্থ-ইষ্ট য়ুনাইটেডৰ প্ৰশিক্ষক জেৰাৰ্ড নাছে আজি ইষ্টবেংগলৰ বিৰুদ্ধে তিনি পইণ্ট সংগ্ৰহৰ লক্ষ্যৰে দলক খেলপথাৰত অৱতীৰ্ণ কৰাব যদিও প্ৰতিপক্ষক সহজভাৱে গ্ৰহণ নকৰিবলৈ দলৰ খেলুৱৈ সকলক সকীয়াই দিছে।