বৰ্ষীয়াণ কংগ্ৰেছ নেতা মতিলাল ভড়া কোভিড আক্ৰান্ত হৈ মৃত্যু : প্ৰধানমন্ত্ৰী মোদীৰ শোক প্ৰকাশ

জ্যেষ্ঠ কংগ্ৰেছ নেতা মতিলাল ভড়াৰ কোভিড১৯ত আক্ৰান্ত হৈ দিল্লীৰ এখন চিকিৎসালয়ত মৃত্যু হৈছে।

বৰ্ষীয়াণ কংগ্ৰেছ নেতাগৰাকীৰ মৃত্যুৰ সময়ত বয়স হৈছিল ৯৩ বছৰ।

কিছুদিনৰ পূৰ্বে মহামাৰী ক’ৰ’ণাত আক্ৰান্ত হোৱা ভড়াক ৰাজধানীৰ ফৰ্টছ এছক’ৰ্ট হাস্পতালত ভৰ্তি কৰোৱা হৈছিল। চিকিৎসাধীন অৱস্থাতে সোমবাৰে ভড়াৰ উক্ত হাস্পতালখনতে মৃত্যু হয়।

পৰিয়ালৰ লোকে জনোৱা অনুসৰি বয়োজ্যেষ্ঠ কংগ্ৰেছ নেতাগৰাকী কোভিডত আক্ৰান্ত হোৱাৰ পিছত শ্বাসযন্ত্ৰত ঘাৰ সৃষ্টি হোৱাৰ ফলত কিছুদিনৰ পৰা ভেণ্টিলেশ্যনত চিকিৎসাধীন হৈ আছিল।

মধ্যপ্ৰদেশৰ প্ৰাক্তন মুখ্যমন্ত্ৰী মতিলাল ভড়াই মৃত্যুৰ সময়লৈকে ছত্তিগড়ৰ পৰা ৰাজ্যসভাৰ সাংসদ হিচাপে কাৰ্যনিৰ্বাহ কৰি আছিল।

নিখিল ভাৰত কংগ্ৰেছ কমিটিৰ কোষাধ্যক্ষ হিচাপে ভড়াই ১৬ বছৰ ধৰি সেৱা আগবঢ়াইছিল। বয়সৰ বাবে ২০১৮ বৰ্ষত উক্ত দায়িত্বৰ পৰা ভড়াই অব্যাহতি দিছিল কংগ্ৰেছ সভানেত্ৰী ছোনিয়া গান্ধীয়ে।

অহা মংগলবাৰে ছত্তিশগড়ত জ্যেষ্ঠ কংগ্ৰেছ নেতাজনৰ শেষকৃত্য ৰাষ্ট্ৰীয় মৰ্যাদাৰে সমাপন কৰা হ’ব।

ভড়াৰ মৃত্যুত দেশৰ প্ৰধানমন্ত্ৰী নৰেন্দ্ৰ মোদীয়ে টুইট কৰি শোক প্ৰকাশ কৰিছে।

“শ্ৰী মতিলাল ভড়াজী এজন জ্যেষ্ঠ কংগ্ৰেছ নেতা আছিল, কেবা দশকজোৰা তেওঁৰ ৰাজনৈতিক জীৱনত তেওঁ প্ৰশাসনিক আৰু সাংগঠিক বিশেষ দক্ষতা তথা অভিজ্ঞতাৰ পৰিচয় দিছিল। তেওঁৰ বিয়োগত মৰ্মাহত হোৱাৰ লগতে শোকসন্তপ্ত পৰিয়ালবৰ্গলৈ সমবেদনা জ্ঞাপন কৰিলো।” প্ৰধানমন্ত্ৰী মোদীয়ে টুইটত কয়।