জনপ্ৰিয় ধাৰাভাষ্যকাৰ ৰবিন জেকমেনৰ মৃত্যু; বিশ্বৰ বিভিন্ন প্ৰান্তৰ অনুৰাগীৰ শ্ৰদ্ধাঞ্জলি

ক্ৰিকেট জগতৰ জনপ্ৰিয় ধাৰাভাষ্যকাৰ তথা ইংলেণ্ডৰ প্ৰাক্তন বলাৰ ৰবিন জেকমেনৰ দেহাৱসান ঘটিছে। মৃত্যুৰ সময়ত তেওঁৰ বয়স আছিল ৭৫ বছৰ।

তেওঁৰ মৃত্যুৰ বাতৰিয়ে বিশ্বজুৰি ক্ৰিকেট অনুৰাগীৰ মনত শোকৰ বন্যা বৈছে।

এগৰাকী ভাল বলাৰ হোৱাৰ লগতে জেকমেন আছিল এগৰাকী ভাল ধাৰাভাষ্যকাৰ। তেওঁৰ অনন্য কথনশৈলীৰ বাবেই তেওঁ খুব জনপ্ৰিয় আছিল ক্ৰিকেট অনুৰাগীৰ মাজত।

ক্ৰিকেটাৰ হিচাপে তেওঁ ১৫খন এদিনীয়া মেচ খেলি ৫৪ ৰান বনাইছিল। বলিঙৰ কথা ক’লে তেওঁ এদিনীয়াত ১৪টা আৰু টেষ্ট ক্ৰিকেটত ১৭টা উইকেট লাভ কৰিছিল।

ৰবিন জেকমেনৰ মৃত্যুৰ খবৰ জানিবলৈ দি ক্ৰিকেটৰ সৰ্বোচ্চ সংস্থা আই চি চিয়ে দুখ প্ৰকাশ কৰিছে।

আই চি চিয়ে টুইটযোগে কয়, ‘মহান ধাৰাভাষ্যকাৰ আৰু ইংলেণ্ডৰ প্ৰাক্তন ক্ৰিকেটাৰ ৰবিন জেকমেনৰ কথা জানি আমি দুখিত, যাৰ ৭৫ বছৰত মৃত্যু হয়’।

উল্লেখ্য যে ১৯৮১ চনৰ মাৰ্চ মাহত ৱেষ্ট ইণ্ডিজৰ বিৰুদ্ধে টেষ্ট ক্ৰিকেটত অভিষেক ঘটিছিল ইং লেণ্ডৰ এইগৰাকী প্ৰাক্তন ক্ৰিকেটাৰ ৰবিন জেকমেনৰ।

ইফালে মৃত্যুৰ খবৰ বিয়পি পৰাৰ লগে লগে ছ’চিয়েল মিডিয়াযোগে বিশ্বৰ বিভিন্ন প্ৰান্তৰ অনুৰাগীয়ে তেওঁক গভীৰ শ্ৰদ্ধাঞ্জলি জ্ঞাপন কৰিছে।