আজৱ কাণ্ড! বেগেজৰ ভাড়া বচাবলৈ ৩০ মিনিটত ৩০ কেজি কমলা খাই পেলালে দুই পৰ্যটকে

অতিৰিক্ত ওজনৰ লাগেজৰ বাবে বৰ্দ্ধিত টকা দিবলৈ কোনোৱে নিবিচাৰে। পৰ্যটকসকলৰ বাবে এইটো এক অস্বস্তিকৰ বিষয় বুলিয়েই ক’ব পাৰি। কিন্তু বৰ্দ্ধিত লাগেজৰ ভাড়া বচাবলৈ গৈ কৰা এনে আজৱ কাণ্ড সঁচাকৈয়ে আচৰিত।

লাগেজৰ অতিৰিক্ত ভাড়া বচাবলৈ ৩০ কিলোগ্ৰাম কমলাটেঙা খাই পেলালে দুজন চীনা পৰ্যটকে। তাকো ৩০ মিনিটৰ ভিতৰতে।

চীনৰ য়ুনান প্ৰদেশৰ কানমিং বিমানবন্দৰত ঘটিছে এনে কাণ্ড। বাতৰি অনুসৰি, চীনা পৰ্যটক দুজনৰ এজনৰ নাম হৈছে ওয়াং। দুয়ো একেলগে বিজনেছ ট্ৰিপত গৈছিল।

তেওঁ আৰু তেওঁৰ সহযোগীজনে ৫০ য়ুনান (ভাৰতীয় মুদ্ৰাত ৫৬৪টকা) দি ৩০ কেজি ওজনৰ কমলাটেঙাৰ এটা বাক্স কিনিছিল।

বিমানত উঠাৰ বাবে বিমানবন্দৰ পোৱাৰ পাছতে তেওঁলোকে জানিব পাৰে যে প্ৰতি কেজি কমলাৰ বাবে ১০ য়ুনানকৈ দিব লাগিব। সকলো মিলি ৩০০ য়ুনান অৰ্থাৎ ভাৰতীয় মুদ্ৰাত ৩,৩৮৪টকা হয়।

টকাৰ পৰিমান শুনিয়েই ওয়াং আৰু তেওঁৰ সহযোগীৰ চকু কপালত উঠিল। সিমান টকা তেওঁলোকে দিব নোৱাৰিব বুলিয়েই ঠিক কৰিলে। কিন্তু বাক্সটো কি কৰা যায়। মুহূৰ্ততে তেওঁলোকে তাৰ সমাধানো বিচাৰি উলিয়ালে।

তেওঁলোকে ঠিক কৰিলে যে তৎমুহূৰ্তে তেওঁলোকে কমলাখিনি খাই শেষ কৰিব। সেইমতেই কাম। ৩০ মিনিটৰ ভিতৰতে ৩০ কেজি কমলা খাই শেষ কৰিলে দুয়োজনে।

তেওঁলোকৰ কাণ্ড দেখি বিমানবন্দৰক কৰ্মীসকলো হতভম্ব হৈ পৰে।