মন্ত্ৰী হিমন্ত বিশ্ব শৰ্মাৰ জীয়ৰীৰ সৈতে ফটোৰ বিকৃত ৰূপ দি গ্ৰেপ্তাৰ হোৱা ৱেবপৰ্টেলৰ সাংবাদিকক আৰক্ষীৰ জিম্মালৈ

মন্ত্ৰী হিমন্ত বিশ্ব শৰ্মা আৰু তেওঁৰ কন্যাৰ ফটো বিকৃত ৰূপত সামাজিক মাধ্যমত প্ৰকাশ কৰি আৰক্ষীৰ জালত পৰিছে প্ৰতিবিম্ব লাইভ নামৰ এটা ৱেব পৰ্টেলৰ সম্পাদকসহ ২ গৰাকী সাংবাদিক আৰু ৩ সংবাদ কৰ্মী।

আৰক্ষীয়ে গ্ৰেপ্তাৰ কৰিছে তফিকউদ্দিন আহমেদ, আছিফ ইকবাল হুছেইন,নজৰুল হুছেইন,নজমুন হক আৰু নিজুল আলীক।

নিশাৰ ভাগতে মন্ত্ৰী হিমন্ত বিশ্ব শৰ্মাৰ পত্নী ৰিণিকি ভুঞা শৰ্মাই দিছপুৰ থানাত প্ৰতিবিম্ব লাইভৰ বিৰুদ্ধে এখন এজাহাৰ দাখিল কৰিছিল।

উক্ত এজাহাৰৰ ভিত্তিত দিছপুৰ আৰক্ষীয়ে IPC 509,R/W sec 14/21 POCSO Act ৰ অধীনত গোচৰ নং ৬১২/২০২১ত পঞ্জীয়ন কৰে।

ইপিনে, আজি পুৱাৰ ভাগত তেওঁলোকক গ্ৰেপ্তাৰ কৰি বিয়লি ভাগত কামৰূপ মহানগৰ জিলা দণ্ডাধীশ আদালতত হাজিৰ কৰে দিছপুৰ আৰক্ষীয়ে। আদালতে অভিযুক্তসকলক ৪ দিনৰ বাবে আৰক্ষীৰ অপৰাধ শাখাৰ জিম্মালৈ প্ৰেৰণ কৰিছে ।

তদুপৰি তফিকউদ্দিন আহমেদ আৰু আছিফ ইকবাল হুছেইনক লগত লৈ জু-ৰোডস্থিত প্ৰতিবিম্ব লাইভৰ কাৰ্যালয়ত আৰক্ষীৰ অপৰাধ শাখাই অভিযান চলায় কেইবাটাও লেপটপ আৰু নথি-পত্ৰ জব্দ কৰে বুলি জানিব পৰা গৈছে।

আনহাতে, মন্ত্ৰী হিমন্ত বিশ্ব শৰ্মাৰ বিষয়ে ফেচবুকত অশালীন পষ্ট কৰি গ্ৰেপ্তাৰ হ’ল নাং নয়ণমণি গগৈ নামৰ শিৱসাগৰৰ এগৰাকী যুৱতী৷

ইপিনে, এই ঘটনাৰ পাছতে প্ৰতিক্ৰিয়া প্ৰকাশ কৰিছে মন্ত্ৰী হিমন্ত বিশ্ব শৰ্মাই।

তেওঁ কয় ‘ৰাজনৈতিক ষড়যন্ত্ৰৰ নামত ইমান তললৈ নমাৰ বাবে ভালো লগা নাই। কালি ৰাতিটো মই শুব পৰা নাই। মোক একো ক্ষেত্ৰতে বলে নোৱাৰিলে, এতিয়া ছোৱালী এংগল আনি দিছে। ইমানদিন দুৰ্নীতি টকাৰ কথা কৈ কৈ ড্ৰাম বজালে এতিয়া আৰু এইবোৰ এংগল জোৰ জবৰদস্তি আনি আছে।‘