উৰহীৰ ওৰ ওলাল: গেৰুৱা হৈ দেখা দিলে তামুলপুৰৰ বিপিএফৰ ‘নিৰুদ্দিষ্ট’ প্ৰাৰ্থী ৰংজা খুঙ্গুৰ বসুমতাৰীয়ে

দেশৰ ৰাজনৈতিক ইতিহাসত এক নোহোৱা-নোপোজা নজিৰৰ সৃষ্টি কৰি ভোটগ্ৰহণলৈ মাত্ৰ কেইটামান দিন বাকী থকাৰ সময়তে তামুলপুৰৰ বিপিএফৰ প্ৰাৰ্থী ৰংজা খুঙ্গুৰ বসুমতাৰীয়ে বিপিএফ দলৰ নেতা-কৰ্মীক হতভম্ব কৰি বিজেপিত যোদদান কৰিলে।

সেই মর্মে কালিৰে পৰা ‘নিৰুদ্দেশ’ হৈ থকা বিপিএফৰ প্ৰাৰ্থীগৰাকীয়ে আজি তামুলপুৰত উপস্থিত হয়।

তামুলপুৰত আজি ৰংজা খুঙ্গুৰ বসুমতাৰীয়ে কেন্দ্ৰীয় মন্ত্ৰী নৰেন্দ্ৰ সিং টমাৰ আৰু বিজেপি নেতা তথা প্ৰাক্তন বিধায়ক ইমানুৱেল মোছাহাৰীৰ উপস্থিতিতিত আনুষ্ঠানিক ভাবে বিজেপিত যোগদান কৰে।

উল্লেখ্য এই কাণ্ডৰ যৱনিকা পৰিছিল কালিতেই। বিপিএফৰ প্ৰাৰ্থীগৰাকীয়ে নিৰ্বাচনৰ প্ৰাকমুহূৰ্তত বিপিএফ এৰি বিজেপিত যোগদান কৰিব বুলি কালিতেই নিশ্চিত কৰা হৈছিল।

প্ৰাৰ্থীগৰাকীয়ে সেইমৰ্মে  কালি গুৱাহাটীত বাহৰ পাতিছিল। উল্লেখ্য ৫৮ নম্বৰ তামুলপুৰ বিধানসভা সমষ্টিৰ বিপএফ দলৰ প্ৰাৰ্থী ৰংজা খুঙ্গুৰ বসুমতাৰী ওৰফে ৰামদাস বসুমতাৰী নিৰুদ্দেশ হৈ পৰা বুলি কালি হৈ-চৈ লগিছিল।

প্ৰাৰ্থী গৰাকীক কোনোবা প্ৰতিপক্ষ দলে হাইজেক কৰা বুলি বিপিএফৰ নেতা কৰ্মী সকলে আজি অভিযোগ কৰিছিল। কাৰণ কালি পুৱাৰ পৰাই তামুলপুৰত বিচাৰি পোৱা নাই প্ৰাৰ্থী গৰাকীক।

তাৎপৰ্যপূৰ্ণ আন দলত যোগদান কৰিলেও অৱশ্যে প্ৰাৰ্থীগৰাকীয়ে বিপিএফৰ নাঙলৰ প্ৰতীকতে প্ৰতিদ্বন্দ্বিতা কৰিব লাগিব।

কাৰণ তেওঁ এতিয়া আৰু প্ৰাৰ্থিত্ব প্ৰত্যাহাৰ কৰিব নোৱাৰে। প্ৰাৰ্থীগৰাকীৰ এনে স্থিতিয়ে এতিয়া শলঠেকত পেলাইছে বিপিএফক।