বিধায়ক হৈ ঠিকনা সলনি হ’ল অখিল গগৈৰ; পত্ৰৰ জৰিয়তে চৰকাৰ আৰু শিৱসাগৰবাসীক কি ক’লে?

বিধায়ক হিচাপে বিধায়ক আৱাসত এক নতুন ঠিকনা লাভ কৰিলে কাৰাৰুদ্ধ অখিল গগৈয়ে।

তেজপুৰৰ প্ৰাক্তন বিধায়ক বৃন্দাবন গোস্বামীৰ আৱাস গৃহটো অখিল গগৈৰ নামৰে নামকৰণ কৰা হৈছে।

বিধায়ক আৱাসৰ ৫৩ নং কুটীৰ দিয়া হৈছে অখিল গগৈক।

ইপিনে, বিধায়ক হিচাপে নিৰ্বাচিত হোৱাৰ পাছতে শিৱসাগৰবাসীক ধন্যবাদ জনাই লগতে চৰকাৰক এক দাবী জনাই পত্ৰ লিখে অখিল গগৈয়ে।

চিঠিত গগৈয়ে চৰকাৰক দাবী জনাই কয় ‘অসমৰ সকলো ৰাইজে বিনামূলীয়াকৈ কৰোনাৰ ভেকচিন পাব লাগে। অহা তিনি মাহৰ ভিতৰতে ৰাজ্যৰ ৩ কোটি ৩০ লাখ জনতাক কৰোনাৰ ভেকচিন প্ৰদানৰ বাবে অনুৰোধ জনাইছো।‘

শিৱসাগৰৰ নৱ-নিৰ্বাচিত বিধায়কগৰাকীয়ে লগতে কয় ‘বিনামূলীয়াকৈ কৰোনাৰ ভেকচিন দিয়াই হৈছে নতুন চৰকাৰৰ সকলোতকৈ প্ৰধান তথা প্ৰথম কাম। লগতে ইয়াৰ প্ৰতিৰোধ কৰাটোও অন্যতম কাম।‘

বিধায়ক হিচাপে অখিল গগৈয়েও হেনো প্ৰথম এই কামেই কৰাৰ বাবে চেষ্টা কৰিব বুলি পত্ৰত উল্লেখ কৰে। লগতে ইয়াৰ বাবে মাত মাতিও যাব যেতিয়ালৈকে চৰকাৰে ইয়াক সফল কৰি তোলাৰ বাবে কাম নকৰে।

চিঠিৰ মাজতে পুনৰ অখিল গগৈয়ে যি সকলে এই জয়ৰ বাবে নিজৰ পকেটৰ ধন খৰছ কৰি নিঃস্বাৰ্থ ভাৱে প্ৰচাৰৰ কাম কৰিলে সকলোকে অশেষ ধন্যবাদ জ্ঞাপন কৰে।