নিৰ্বাচিত লোকে ঘৰতে বহি কৰিব পাৰিব কৰোনাৰ টেষ্ট! কোনসকল লোকে লাভ কৰিব এই সুবিধা?

ইণ্ডিয়ান কাউন্সিল অৱ মেডিকেল ৰিচাৰ্ছ(ICMR)এ ঘৰতে বহি কৰোনাৰ টেষ্ট কৰাৰ সুবিধা প্ৰদান কৰিছে। অৱশ্যে সকলো লোকৰ বাবে এই সুবিধা উপলব্ধ নহ’ব।

ICMRএ ইতিমধ্যে ৰেপিড এণ্টিজেন টেষ্ট কীটৰ এক সংস্থাক ইয়াৰ বাবে অনুমতি প্ৰদান কৰিছে।

ICMRএ প্ৰকাশ কৰা অনুসৰি কোভিডৰ লক্ষণ দেখা দিয়া, লেবেটৰীৰ কোভিড টেষ্ট ৰিজাল্টত পজিটিভ অহা কোনো লোকৰ সংস্পৰ্শলৈ অহা আদি লোকেহে এই কীটৰ দ্বাৰা কৰোনাৰ টেষ্ট কৰিব পাৰিব।

পুনেৰ মাইলেব ডিছক’ভাৰী চলিউশ্যন লিমিটেড নামৰ প্ৰতিষ্ঠানটোৱে প্ৰস্তুত কৰা এই ৰেপিড এণ্টিজেন টেষ্ট কীটটোৰ নাম হৈছে কোভিচেল্ফিটিএম (পাথাকাচ)।

এই কীটটোৰে কিদৰে কোভিড টেষ্ট কৰিব পাৰি সেই বিষয়ে প্ৰতিষ্ঠানটোৱে এটা মোবাইল এণ্ড্ৰয়ড এপো উদ্ভাৱন কৰিছে, যিটো গুগল প্লে ষ্ট’ৰত উপলব্ধ হ’ব।

ICMRএ প্ৰকাশ কৰা অনুসৰি কোভিড টেষ্ট কৰা লোকগৰাকীৰ পৰীক্ষা সংক্ৰান্তীয় তথ্যসমূহ এটা বিশেষ চাৰ্ভাৰৰ দ্বাৰা সুৰক্ষিত কৰি ৰখা হ’ব, যিটো চাৰ্ভাৰ ICMRৰ কোভিড পৰীক্ষা প’ৰ্টেলৰ সৈতে সংযোগ কৰা হৈছে।

“এই পৰীক্ষাত যাৰ পজিটিভ ৰিজাল্ট আহিব তেওঁক কোভিড পজিটিভ হিচাপে ধৰা হ’ব। কিন্তু যাৰ লক্ষণ আছে আৰু ৰিপ’ৰ্ট নিগেটিভ আহিছে তেওঁক পুনৰ আৰটি-পিচিআৰ টেষ্ট কৰোৱা হ’ব।” ICMR-এ কয়।

অৱশ্যে এই কীট এতিয়াই উপলব্ধ হোৱা নাই। ICMRৰ মতে আৰু কিছুদিনৰ পিছতহে এই কোভিড টেষ্ট কীট বজাৰত উপলব্ধ হ’ব।