ভেকচিনক লৈ উত্তপ্ত অসম বিধানসভা; বিয়লি ৩বজালৈ স্থগিত সদন

অসম বিধানসভাৰ আজি পঞ্চমটো দিনত পুৱা প্ৰশ্নোত্তৰ কালত কোভিডৰ ভেকচিনৰ প্ৰসংগ লৈ সদন উত্তপ্ত হৈ পৰে।

বিধানসভাত বিৰোধী দলপতি দেবব্ৰত শইকীয়াৰ এক প্ৰশ্নৰ স্বাস্থ্যমন্ত্ৰী কেশৱ মহন্তই উত্তৰ দিয়াৰ সময়তে সদনত হুলস্থুলীয়া পৰিৱেশৰ সৃষ্টি হয়।

দেৱব্ৰত শইকীয়াৰ প্ৰশ্নৰ মাজতে কংগ্ৰেছী বিধায়ক ভৰত নৰহে কিছু প্ৰশ্নৰ অৱতাৰণা কৰে।

তাৰ মাজতে মন্ত্ৰী পীযুষ হাজৰিকাই কংগ্ৰেছৰ বিৰুদ্ধে ভেকচিনক লৈ অপপ্ৰচাৰ চলোৱাৰ অভিযোগ তোলে।

মন্ত্ৰী হাজৰিকাই অভিযোগ কৰি কয় যে কংগ্ৰেছৰ অপপ্ৰচাৰৰ বাবেই ৰাজ্যখনত পূৰ্বতে বহু ভেকচিন নষ্ট হৈছে।

মন্ত্ৰী হাজৰিকাৰ এনে অভিযোগৰ পাছতেই কংগ্ৰেছৰ সদস্যসকলে জাঙুৰ খাই উঠে আৰু চৰকাৰৰ বিৰুদ্ধে প্ৰতি অভিযোগ আনে।

কংগ্ৰেছৰ সদস্যসকলে সদনত ‘মদ নালাগে, ভেকচিন লাগে’ বুলিও মন্তব্য কৰা দেখা যায়।

এনেদৰে সদনত হুলস্থুলীয়া পৰিস্থিতিৰ সৃষ্টি হোৱাৰ পাছত অধ্যক্ষ বিশ্বজিয দৈমাৰীয়ে সদন বিয়লি ৩ বজালৈ স্থগিত কৰে।

উল্লেখ্য যে আজি বিধানসভাত বিত্ত মন্ত্ৰী অজন্তা নেওগে নতুন মন্ত্ৰীসভাৰ প্ৰথমখন বাজেট দাখিল কৰা কথা আছে।