লাডাখত অচলাৱস্থা দূৰ কৰিবলৈ মস্কোত ভাৰত-চীনৰ প্ৰতিৰক্ষা মন্ত্ৰীৰ ২ঘন্টা ২০মিনিটৰ বৈঠক

লাডাখত চলি থকা অচলাৱস্থাৰ অৱসান ঘটাবলৈ ভাৰত-চীন দুয়োখন দেশে অৱশেষত আলোচনাত মিলিত হ’ল।

গোটেই বিশ্বৰ দৃষ্টি আকৰ্ষণ কৰা বিষয়টোক লৈ শুকুৰবাৰে মস্কোৰ মেট্ৰ’পল হোটেলত নিশা ভাৰত-চীনৰ প্ৰতিৰক্ষা মন্ত্ৰীৰ মাজত বৈঠক অনুষ্ঠিত হয়।

বিশ্বৰ দুখন পৰমানু শক্তিৰ অধিকাৰী দেশৰ মাজত সমাধান সূত্ৰ বিচাৰি ২ঘন্টা ২০ মিনিট জুৰি আলোচনা হয়।

চীনৰ সদিচ্ছাৰ প্ৰতি সঁহাৰি জনাই ভাৰতৰ প্ৰতিৰক্ষা মন্ত্ৰী ৰাজনাথ সিং এই বৈঠকত উপস্থিত আছিল।

সেইদৰে বৈঠকত উপস্থিত আছিল চীনৰ প্ৰতিৰক্ষা মন্ত্ৰী জেনেৰেল ফেংঘে।

প্ৰতিৰক্ষা মন্ত্ৰী ৰাজনাথ সিঙে দুইখন দেশৰ মাজত হোৱা বৈঠকৰ ছবি প’ষ্ট কৰিছে। এই ছবি ছচিয়েল মিডিয়াত ভাইৰেল হৈ পৰে।

বৈঠকৰ সৱিশেষ জানিব পৰা হোৱা নাই যদিও আলোচনাত ভাৰতৰ প্ৰতিৰক্ষা মন্ত্ৰী ৰাজনাথ সিং কিছু আক্ৰামণাত্মক হৈ পৰা বুলি কোৱা হৈছে।

গলৱান সংঘৰ্ষৰ পাছত শুকুৰবাৰে প্ৰথমবাৰৰ বাবে দুয়োখন দেশৰ নেতাৰ মাজত বৈঠক অনুষ্ঠিত হয়।

বিগত দহদিন ধৰি পৰিস্থিতিৰ কিছু পৰিৱৰ্তন ঘটিছে। চীনৰ আক্ৰমণৰ পৰা নিজক সুৰক্ষিত কৰাৰ বাবে ভাৰতেও নিজৰ স্থিতি সলনি কৰিছে।

ইয়াৰ মাজতে ভাৰতৰ বিদেশ সচিব হৰ্ষ চিংলাই কয় যে চীন সীমান্তত ১৯৬২চনৰ পাছত এনে সমস্যা উদ্ভৱ হোৱা নাছিল। তেওঁ সীমান্ত সমস্যাই দ্বিপাক্ষিক সম্পৰ্কতো প্ৰভাৱ পেলোৱাৰ কথা ব্যক্ত কৰে।

আনহাতে, সেনা প্ৰধান নাৰাৱনেও ভাৰত-চীন সীমান্তৰ পৰিস্থিতি সংবেদনশীল বুলি মন্তব্য কৰিছে।