তালিবানৰ পাছতে আইছিছৰ দপদপনি! ইৰাকত সন্ত্ৰাসবাদী আক্ৰমণত নিহত ১৩গৰাকী আৰক্ষী

আফগানিস্তানত তালিবানৰ শাসন আৰম্ভ হোৱাৰ মুহূৰ্ততে দেশখনত সন্ত্ৰাসবাদীৰ ভূস্বৰ্গ হৈ পৰাৰ আশংকা ব্যক্ত কৰিছে বিভিন্ন মহলে।

ইয়াৰ মাজতে এইবাৰ ইৰাকত আইছিছ সন্ত্ৰাসবাদী চলালে আক্ৰমণ। শনিবাৰে নিশা চলোৱা এই আক্ৰমণত ১৩গৰাকী আৰক্ষী নিহত হৈছে।

বাতৰি অনুসৰি, উত্তৰ ইৰাকৰ কিৰকুকৰ সমীপত এটা চেকপ’ষ্টত সন্ত্ৰাসবাদীয়ে অতৰ্কিতে আক্ৰমণ চলায়। দেশখনত শেহতীয়াভাৱে সংঘটিত হোৱা এইটো হৈছে আটাইতকৈ ডাঙৰ সন্ত্ৰাসবাদী আক্ৰমণৰ ঘটনা।

আফগানিস্তানত তালিবানৰ প্ৰত্যাৱৰ্তনৰ পাছতে পুনৰ সন্ত্ৰাসবাদী সংগঠনসমূহে মূৰ দাঙি উঠিছে।

জানিব পৰা মতে, সমগ্ৰ বিশ্বকে উদ্বিগ্ন কৰি তালিবানৰ পতাকা হাতত লৈ কাবুলৰ বহু স্থানত বিদেশী সন্ত্ৰাসবাদী গোটে বাহৰ পাতিছে। ইয়াৰ বিতৰত আইএছ, লস্কৰ, অল কায়দা তথা জইচৰ সদস্য আছে।

এনে সময়তে ইৰাকৰ দৰে দেশত আইছিছ সন্ত্ৰাসবাদীৰ নতুনকৈ আক্ৰমণৰ ঘটনাই বিশ্বজুৰি উদ্বিগ্নতা বৃদ্ধি কৰিছে।

উল্লেখ্য যে শুকুৰবাৰে নিউজিলেণ্ডৰ অকলেণ্ডত এটা শ্বপিং মলত এজন আইছিছ সমৰ্থকে আক্ৰমণ চলাই সন্ত্ৰাসৰ সৃষ্টি কৰিছিল। আক্ৰমণকাৰীজনৰ ছুৰীকাঘাতত ৬জন লোক আহত হৈছিল।