ত্ৰিপুৰাত সাম্প্ৰদায়িক অস্থিৰতা, আঁৰত বিশ্ব হিন্দু পৰিষদ

ক্ৰমাৎ সাম্প্ৰদায়িক উত্তেজনা বিয়পি পৰিছে বিজেপি শাসিত ৰাজ্য ত্ৰিপুৰাত। এই সম্পৰ্কে ত্ৰিপুৰা আৰক্ষীয়ে ৰাজ্যখনত কাঢ়া নিৰ্দেশনা জাৰি কৰিছে।

আৰক্ষীয়ে জনায় যে সামাজিক মাধ্যমযোগে সাম্প্ৰদায়িক উত্তেজনা বিয়পোৱাসকলৰ বিৰুদ্ধে কঠোৰ আইনী ব্যৱস্থা গ্ৰহণ কৰা হ’ব। তদুপৰি সাম্প্ৰদায়িক উত্তেজনালৈ লক্ষ্য ৰাখি সমগ্ৰ ৰাজ্যজুৰি কঠোৰ নিৰাপত্তা ব্যৱস্থাৰো গ্ৰহণ কৰা হৈছে।

উল্লেখযোগ্য যে মঙলবাৰে আবেলি ৰাজ্যখনৰ উত্তৰ অঞ্চলৰ পানীসাগৰ উপসংমণ্ডলত বিশ্ব হিন্দু পৰিষদৰ এটা সমদল বাহিৰ কৰা হয়।

বাংলাদেশত হিন্দু নিগ্ৰহৰ প্ৰতিবাদত বাহিৰ কৰা উক্ত সমদলটো চলি থকা অৱস্থাতে চামটিল্লা অঞ্চলৰ এটা মছজিদৰ ক্ষতিসাধন কৰা হয়।

মছজিদৰ উপৰিও দুখন দোকান আৰু তিনিটাকৈ আবাসগৃহতো দুষ্কৃতিকাৰীসকলে অগ্নিসংযোগ কৰে।

তাৰপাছৰে পৰা সাম্প্ৰদায়িক উত্তেজনা বিয়পি পৰিছে ত্ৰিপুৰাত।

ত্ৰিপুৰা আৰক্ষীয়ে এই সংক্ৰান্তত এখন এজাহাৰ দাখিল কৰিছে। ৰাজ্যখনৰ আইন-শৃংখলাজনিত পৰিস্থিতিলৈ লক্ষ্য ৰাখি স্পৰ্শকাতৰ অঞ্চলসমূহত নিৰাপত্তা ব্যৱস্থা শক্তিশালী কৰা হৈছে বুলি আৰক্ষী বিষয়া সকলে জানিবলৈ দিছে।