Omicron variant কোভিডৰ দক্ষিণ আফ্ৰিকাৰ প্ৰজাতিত আক্ৰান্ত জনে সোৱাদো পায়, গোন্ধও পায়!

নানা ৰূপ ধাৰণ কৰি এতিয়া বিশ্বত মহাত্ৰাসৰ সৃষ্টি কৰিছে কোভিডে ।

শেহতীয়াকৈ কোভিডৰ দক্ষিণ আফ্ৰিকাৰ প্ৰজাতি অমিক্ৰনকলৈ সৃষ্টি হৈছে নতুন ত্ৰাসৰ। কোভিডৰ ডেল্টা, কাপ্পা আদি প্ৰজাতিত আক্ৰান্ত জনে বস্তুৰ সোৱাদ লাভ অথবা গোন্ধ পোৱাৰ ক্ষমতা হেৰুৱাই পেলায় যদিও নতুন প্ৰজাতি অমিক্ৰনৰ ক্ষেত্ৰত তেনে কোনো ঘটনা নঘটে।সেই বাবেই বাঢ়িছে বিপদ। কাৰণ সোৱাদ-গোন্ধ পাই থকা জনে নিজকে কোভিড আক্ৰান্ত বুলি ভাবিবলৈ টান পায়। ফলত ৰোগ অধিক বিয়পি পৰাৰ ভয় থাকে।

অৰ্থাৎ ৰোগীয়ে সোৱাদো পায়, গোন্ধও পায়। অৱশ্যে অমিক্ৰন প্ৰজাতিৰ কোভিডৰ লক্ষণ তেনেই সাধাৰণ বুলি দাবী কৰিছে দক্ষিণ আফ্ৰিকাৰ এগৰাকী বিশিষ্ট চিকিৎসকে।

দক্ষিণ আফ্ৰিকা মেডিকেল এছোচিয়েছনৰ অধ্যক্ষ ডাঃ এঞ্জেলিক কোৱেৎজী হৈছে দেশ খনত অমিক্ৰন প্ৰজাতিৰ কোভিডৰ কথা পোহৰলৈ অনা প্ৰথমগৰাকী চিকিৎসক। চিকিৎসকগৰাকীয়ে প্ৰকাশ কৰা মতে অমিক্ৰণ প্ৰজাতিৰ কোভিডত আক্ৰান্ত জনৰ শৰীৰত বিশেষ কোনো ভয়াৱহ লক্ষণ ফুটি নুঠে। এই লক্ষণ তেনেই সাধাৰণ তথা ঘৰুৱা পৰিবেশতে ইয়াৰ চিকিৎসা কৰিব পাৰি।
উল্লেখ্য ১৮ নৱেম্বৰত চিকিৎসকগৰাকীয়ে সাত গৰাকী ৰোগীৰ দেহত কোভিডৰ কিছু বেলেগ ধৰণৰ লক্ষণ প্ৰত্যক্ষ কৰিছিল। সেই লক্ষণসমূহ ডেল্টা প্ৰজাতিৰ লক্ষণতকৈ কিছু বেলেগ আছিল। ৰোগীৰ পৰীক্ষা কৰোৱাৰ পিছতে তেওঁলোক এক নতুন প্ৰজাতিৰ কোভিডত আক্ৰান্ত বুলি নিশ্চিত কৰা হয়।
ইয়াৰ পিছতে অমিক্ৰনকলৈ বিশ্ব জুৰি ত্ৰাসৰ সৃষ্টি হয়।

অমিক্ৰনৰ সংক্ৰমণৰ পৰিপ্ৰেক্ষিততে অহা ১ ডিচেম্বৰৰ পৰা নতুন কোভিড বিধি প্ৰযোজ্য কৰিবলৈ আগবাঢ়িছে কেন্দ্ৰীয় চৰকাৰে। এই সন্দৰ্ভত দেওবাৰে কেন্দ্ৰই নিৰ্দেশনা প্ৰকাশ কৰিছে।
এই নতুন নিৰ্দেশনা অনুসৰি, অ’মিক্ৰনৰ বাবে অহা ১ ডিচেম্বৰৰ পৰা বিদেশৰ পৰা সকলো যাত্ৰীয়ে বিগত ১৪ দিনৰ ট্ৰেভেল হিষ্ট্ৰী জমা দিব লাগিব।

তদুপৰি, বিদেশৰ পৰা অহা যাত্ৰীসকলে আৰটি-পিচিআৰ টেষ্টৰ ৰিপ’ৰ্ট জমা দিব লাগিব। যাত্ৰীসকলে কেন্দ্ৰৰ এয়াৰ সুবিধা প’ৰ্টেলত এখন ছেল্ফ ডিক্লাৰেশ্যন ফৰ্ম পূৰণ কৰি সকলো তথ্য জমা দিব লাগিব।

আনহাতে, যাত্ৰা কৰাৰ ৭২ ঘন্টাৰ পূৰ্বে কৰা আৰটি-পিচিআৰ টেষ্টহে গ্ৰহণযোগ্য হ’ব বুলিও কেন্দ্ৰীয় চৰকাৰে জানিবলৈ দিছে। এইক্ষেত্ৰত কোনোৱে ভুৱা ৰিপ’ৰ্ট জমা দিলে সেই যাত্ৰীৰ বিৰুদ্ধে ফৌজদাৰী গোচৰ কৰা হ’ব।

সেইদৰে, সংক্ৰমণ ঘটা দেশসমূহৰ পৰা অহা বিমানযাত্ৰীসকল, বিশেষকৈ ব্ৰিটেইনকে ধৰি ইউৰোপীয় দেশসমূহ, দক্ষিণ আফ্ৰিকা, ব্ৰাজিল, বাংলাদেশ, বাৎছোৱানা, চীন, মৰিছাছ, জিম্বাবৱে, নিউজিলেণ্ড, হংকং, ছিংগাপুৰ, ইজৰাইলৰ পৰা যাত্ৰীসকলৰ ওপৰত দৃষ্টি ৰখাৰ নিৰ্দেশ দিয়া হৈছে।

উক্ত দেশসমূহৰ কোনো যাত্ৰী ভাৰতলৈ আহিলে তেওঁলোকে নিজৰ খৰচত কৰ’না টেষ্ট কৰিব লাগিব আৰু সেই টেষ্টৰ ফলাফল নহালৈকে বিমানবন্দৰতে থাকিব লাগিব। ফলাফল পজিটিভ ধৰা পৰিলে আনুষ্ঠানিক কোৱাৰেন্টাইনত ৰখা হ’ব।