কাজিৰঙা ৰাষ্ট্ৰীয় উদ্যানত ঢেকীয়াপতীয়া বাঘৰ কংকাল উদ্ধাৰকলৈ চাঞ্চল্য

কাজিৰঙা ৰাষ্ট্ৰীয় উদ্যানৰ কহঁৰা বনাঞ্চলত আজি পুৱা এটা ঢেকীয়াপতীয়া বাঘৰ কংকাল উদ্ধাৰ হোৱাকলৈ চাঞ্চল্যৰ সৃষ্টি হৈছে ৷

ৰাষ্ট্ৰীয় উদ্যানখনৰ বনকৰ্মীয়ে আজি পুৱা কহঁৰা বনাঞ্চলৰ কাৰচিন বন শিৱিৰ এলেকাৰ এখন কাঠনিত বাঘটোৰ কংকাল প্ৰত্যক্ষ কৰি বনাঞ্চলিক বিষয়াক খবৰ দিয়ে ৷

পিচত কাজিৰঙাৰ বন সংমণ্ডল বিষয়া ৰমেশ কুমাৰ গগৈ, উপ- বন সংৰক্ষক খৰ্গসিং ডেকা ৰজা, গৱেষণা বিষয়া ৰবীন্দ্ৰ শৰ্মা, বনাঞ্চলিক বিষয়া বিভূতি ৰঞ্জন গগৈ আৰু পশু চিকিৎসক ডা৹ বিশ্বজিত গগৈ ঘটনাস্থলীত উপস্থিত হৈ ঘটনাৰ তদন্ত কৰাৰ লগতে বাঘটোৰ অৱশিষ্ট কংকাল আৰু ছালৰ নমুনা সংগ্ৰহ কৰে ৷

প্ৰথম অৱস্থাত ঢেকীয়াপতীয়া বাঘটোৰ নিজৰ ভিতৰতে লগা যুঁজত মৃত্যু হোৱা বুলি ধাৰণা কৰা হৈছিল তদন্তকাৰী দলৰ পৰীক্ষাত বাঘটোৰ লাওঁখোলাত পোৱা তথ্যৰ আধাৰত বাঘটোৰ ম’হৰ আক্ৰমণত মৃত্যু হোৱা বুলি নিশ্চিত কৰা হয়৷

প্ৰায় এসপ্তাহৰ আগতে মৃত্যু হোৱা তিনি বছৰীয়া মতা বাঘটোৰ কংকাল আৰু ছালৰ অৱশিষ্ট ৰাষ্ট্ৰীয় বাঘ সংৰক্ষণ প্ৰাধিকৰণৰ নিৰ্দেশানুসৰি ঘটনাস্থলীতে দাহ কৰা হয় ৷

উল্লেখ্য যে চলিত বৰ্ষত কাজিৰঙাত ঢেকীয়াপতীয়া বাঘৰ মৃতদেহ উদ্ধাৰ হোৱাৰ এয়াই প্ৰথম ঘটনা