ঠিকাদাৰলৈ বাট নাচাই গাঁঠিৰ ধন ভাঙি কোটিটকীয়া আৱন্টিত চটাই চিনাতলী পথ মেৰামতিত নামিল ৰাইজ

২০২০ চনতে টীয়কৰ চটাই চিনাতলী সংযোগী একমাত্ৰ পথটি টীয়ক সমষ্টিৰ বিধায়িকাই আধাৰশিলা কৰিছিল যদিও আজি ডেৰটা বছৰে পথটোৰ কাম সম্পূৰ্ণ হৈ নুঠিল যাৰ বাবে এতিয়া দুৰ্ভোগ ভুগিছে সাধাৰণ ৰাইজে।

উন্নয়নৰ কথাকৈ এইখন চৰকাৰে ইতিমধ্যে অসমত ছয়টাকৈ বছৰ শাসন কৰিছে কিন্তু প্ৰকৃততে কিদৰে উন্নয়ন হৈছে তাৰে প্ৰমাণ এই পথটো।

কাগজে পত্ৰই কাম হৈছে যদিও প্ৰকৃতাৰ্থত ঠিকাদাৰৰ গাফিলতিয়েও হওক বা বিভাগীয় কৰ্তৃপক্ষৰ অমনোযোগিতায়ে হওক এনেদৰে সমষ্টিত একাধিক কাম চলি থকা অভিযোগ উত্থাপিত হৈছে।

লগতে পঢ়ক: গুণোৎসৱৰ বতৰ: ৰাজ্যৰ এখন চৰকাৰী বিদ্যালয়ত এজন শিক্ষকে পাঠদান কৰিছে পাঁচটাকৈ শ্ৰেণীত

ইপিনে, কোটি টকা ব্যয় সাপেক্ষে নিৰ্মাণ হ’বলগীয়া এই পথৰ আধাৰশিলাৰ পাছতে কিছুদিন কাম চলিছিল আৰু ঠিকাদাৰ প্ৰতিষ্ঠানটিৰ সৈতে চুক্তি মৰ্মে স্থানীয় কেইবাজনো যুৱকে শিল, বালি, মাটি আদিৰ যোগান ধৰিছিল যদিও আজি পৰ্যন্ত তেওঁলোকক প্ৰাপ্য ধন প্ৰদান নকৰি ঠিকাদাৰ পলায়ন কৰাৰ অভিযোগ উঠিছে।

উল্লেখযোগ্য যে অঞ্চলবাসীয়ে ইতিমধ্যে জিলা উপায়ুক্তক এই বিষয়ে অৱগত কৰাৰ পাছত উপায়ুক্ত গৰাকীয়ে ৰাইজৰ দুখ-দুৰ্দশাৰ বুজ ল’বলৈ যোৱা মাৰ্চ মাহত উক্ত স্থানলৈ আহি চৰজমিন তদন্ত কৰি অনতিপলমে ইয়াৰ এক সু ব্যৱস্থা কৰিব বুলি আশ্বাস দিছিল যদিও আজিও একো উত্তৰ নোলাল।

লগতে পঢ়ক: বুল্লুটত ভূমি বিবাদক কেন্দ্ৰ কৰি দুৰ্বৃত্তৰ দলৰ আক্ৰমণত আহত শিশু-মহিলাসহ ৫ জনকৈ লোক

ইপিনে গাঁৱৰ একাংশ সচেতন ব্যক্তিয়ে ৰাজ্যৰ মুখ্যমন্ত্ৰীকো বিষয়টো অৱগত কৰিছে। কিন্তু কেনিও সুদুত্তৰ নাপাই এতিয়া ৰাইজে নিজে গাঁঠিৰ ধন ভাঙি হাতে কামে লাগি যেনে তেনে পথটো অহা যোৱাৰ বাবে সুচল কৰিবলৈ চেষ্টা অব্যাহত ৰাখিছে।

এতিয়া প্ৰশ্ন হয়, কাক ক’লে দৰাচলতে এইসকল ৰাইজে সুফল পাব বা কোনে এনে ঠিকাদাৰক নাকি লগাব?