কাৰ্যালয়ত ওলমাইছিল লাডেনৰ ফটো: নিলম্বনৰ সন্মুখীন চৰকাৰী বিষয়া

কাৰ্যালয়ত বিশ্বত্ৰাস সন্ত্ৰাসবাদী তথা আল কায়দাৰ মুৰব্বী নিহত ওচামা বিন লাডেনৰ ফটো ওলমাই নিলম্বনৰ সন্মুখীন হৈছে এজন চৰকাৰী বিষয়া। এই ঘটনা সংঘটিত হৈছে উত্তৰ প্ৰদেশত। ৰাজ্যখনৰ ফাৰুখাবাদৰ এটা চৰকাৰী বিদ্যুৎ বিতৰণ কোম্পানীৰ এজন উপ-বিভাগীয় বিষয়াক কাৰ্যালয়ত ওচামা বিন লাডেনৰ ফটো ৰখাৰ বাবে নিলম্বিত কৰা হৈছে।

নিলম্বিত বিষয়াজনৰ নাম দক্ষিণাঞ্চল বিদ্যুৎ বিতৰণ নিগম লিমিটেডৰ (ডিভিভিএনএল) উপ-বিভাগীয় বিষয়া (এছডিঅ’) ৰবীন্দ্ৰ প্ৰকাশ গৌতম বুলি জানিব পৰা গৈছে।

গৌতমৰ কাৰ্যালয়ত বিন লাডেনৰ এখন ছবি পোৱাৰ পিছতে বিভাগীয় জেষ্ঠ বিষয়াসকলে তেওঁক চাকৰিৰ পৰা নিলম্বন কৰে।

কাৰ্যালয়ত ওলমাই থোৱা ছবিখনৰ তলতে এটা টোকা সংযোগ কৰা হৈছিল আৰু এই টোকাটোত লাডেনক “বিশ্বৰ শ্ৰেষ্ঠ কনিষ্ঠ অভিযন্তা সন্মানীয় ওচামা বিন লাডেন” বুলি অভিহিত কৰা হৈছিল।

সামাজিক মাধ্যমত কাৰ্যালয়ত ওলমাই থোৱা এই ছবিখন ভাইৰেল হোৱাৰ পিছত বিভাগীয় বিষয়াসকলে জানিব পাৰে।

ইয়াৰ পিছতে জ্যেষ্ঠ জিলা বিষয়াসকলে বিষয়টো পৰ্যবেক্ষণ কৰি লগে লগে এছডিঅ’ গৌতমক শাস্তি হিচাপে নিলম্বনৰ সিদ্ধান্ত গ্ৰহণ কৰে।

গৌতমক নিলম্বন কৰাৰ পাছতে তেওঁৰ কাৰ্যালয়ৰ পৰা বিন লাডেনৰ ছবিখনো আঁতৰাই দিয়া হয়।

এই সন্দৰ্ভত ফাৰুখাবাদৰ জিলা দণ্ডাধীশ সঞ্জয় কুমাৰ সিঙে কয়, “ঘটনাটোৰ তদন্তৰ পিছতে ডিভিভিএনএলৰ পৰিচালনা সঞ্চালকে এছডিঅ’ ৰবীন্দ্ৰ প্ৰকাশ গৌতমক নিলম্বন কৰিছে।”

অৱশ্যে, নিলম্বিত বিষয়াজনে আত্মপক্ষ সমৰ্থনত দাবী কৰিছে যে যিকোনো ব্যক্তি কাৰোবাৰ আদৰ্শ হ’ব পাৰে।

তেওঁ কয়, “ওছামা বিশ্বৰ শ্ৰেষ্ঠ কনিষ্ঠ অভিযন্তা আছিল। ছবিখন আঁতৰ কৰা হৈছে, কিন্তু মোৰ ওচৰত ছবিখনৰ কেইবাটাও প্ৰতিলিপি আছে।”