অৰুণাচলত সন্ধানহীন অসমৰ পাঁচ শ্ৰমিকৰ মৃতদেহ উদ্ধাৰ: নিহতৰ সংখ্যা ছয়জনলৈ বৃদ্ধি

অৰুণাচল প্ৰদেশৰ কুৰুং কুমে জিলাৰ এটা পথ নিৰ্মাণ ক্ষেত্ৰৰ পৰা সন্ধানহীন হোৱা অসমৰ ১৯ জন শ্ৰমিকৰ ভিতৰত পাঁচজন শ্ৰমিকৰ মৃতদেহ এখন ঘন অৰণ্যত উদ্ধাৰ কৰা হৈছে।

উদ্ধাৰকাৰী দলে যোৱা কেইদিনমানৰ ভিতৰত হুৰি আৰু তাপাৰ মাজৰ ঘন অৰণ্যত পাঁচটা সম্পূৰ্ণ গলিত অৱস্থাত মৃতদেহ কেইটা উদ্ধাৰ কৰিছে বুলি কুৰুং কুমেৰ উপায়ুক্ত নিঘি বেংগিয়াই সদৰি কৰিছে।

অৰণ্যৰ মাজত পৃথক পৃথক স্থানত ক্ৰমে ২৫ জুলাইত এজনৰ, ২৬ জুলাইত তিনিজনৰ আৰু ২৮ জুলাইত আন এজন শ্ৰমিকৰ মৃতদেহ উদ্ধাৰ হৈছে বুলি বেংগিয়াই লগতে কয়।

এই পাঁচটা মৃতদেহ উদ্ধাৰ হোৱাৰ লগে লগে ঘটনাটোত মৃত্যুৰ সংখ্যা ছয়জনলৈ বৃদ্ধি পাইছে। হিকমত আলী ফুৰ নামৰ এজন শ্ৰমিকৰ মৃতদেহ ইতিপূৰ্বে নদীত উপঙি থকা অৱস্থাত পোৱা গৈছিল।

উদ্ধাৰ হোৱা মৃতদেহ কেইটা ক্ৰমে ফৰিজুল হক, মৈজল হক, ছোহাৰ আলী আৰু আবুল হুছেইনৰ বুলি চিনাক্ত কৰা হৈছে। আনহাতে মৃত আনজন শ্ৰমিকক এতিয়াও চিনাক্ত কৰিব পৰা হোৱা নাই। অৱশ্যে মৃতদেহকেইটা সম্পূৰ্ণ ৰূপে গলিত অৱস্থাত থকাৰ বাবে অসমলৈ ঘূৰাই আনিব পৰা নগ’ল।

উল্লেখ্য যে অসমৰ পৰা যোৱা শ্ৰমিকসকলে ঈদৰ ছুটি নোপোৱাৰ বাবে যোৱা ৫ জুলাইত ভাৰত-চীন সীমান্তৰ কোলোৰিয়াঙৰ জিলা সদৰৰ পৰা ২০০ কিলোমিটাৰ দূৰত্বত থকা দামিন চক্ৰৰ দূৰৱৰ্তী পথ নিৰ্মাণ স্থানৰ পৰা পলাই আহিছিল।

তাৰ পিছত তেওঁলোকে ৮ আৰু ১১ জনীয়া দুটা গোটত ভাগ হৈ খোজৰে নিজা বাসস্থানলৈ যাত্ৰা কৰিছিল। তেতিয়াৰ পৰাই সন্ধানহীন হৈ আছিল এই শ্ৰমিক সকল।

অৱশ্যে ইয়াৰে দহজন শ্ৰমিকক এতিয়ালৈকে জীৱন্তন্ত অৱস্থাত উদ্ধাৰ কৰা হৈছে। শাৰীৰিক ভাৱে অত্যন্ত দুৰ্বল অৱস্থাত উদ্ধাৰ কৰা এই শ্ৰমিকসকল বৰ্তমান অৱশ্যে চিকিৎসাৰ পিছত আৰোগ্য হৈ উঠিছে বুলি কুৰুং কুমেৰ উপায়ুক্ত নিঘি বেংগিয়াই উল্লেখ কৰে।