মাজুলীৰ ওপৰত নিৰ্মিত তথ্যচিত্ৰ ‘দ্য আনট’ল্ড মাজুলী’ ইউটিউবত মুক্তি

যুৱ প্ৰজন্মৰ চিত্ৰ নিৰ্মাতা বিশাল পি বৰুৱাৰ দ্বাৰা নিৰ্মিত ‘দ্য আনট’ল্ড মাজুলী’ নামৰ তথ্যচিত্ৰখন দেওবাৰে ইউটিউবত মুক্তি দিয়া হৈছে।

পৃথিৱী দিৱসৰ সৈতে সংগতি ৰাখি মুক্তি দিয়া তথ্যচিত্ৰখনত বিশ্বৰ ভিতৰতে বৃহত্তম নদী-দ্বীপ মাজুলীৰ গুপ্ত আৰু অপ্ৰকাশিত কাহিনী সন্নিৱিষ্ট কৰা আছে।

এই তথ্যচিত্ৰখনত ‘অৰণ্য মানৱ’ যাদব পায়েঙকে ধৰি ৪গৰাকী লোকৰ দৃষ্টিকোণৰ ফালৰ মাজুলীক অৱলোকন কৰা হৈছে। প্ৰতি বছৰে অহা প্ৰৱল বানপানী আৰু খহনীয়াৰ পৰা মাজুলীৰ গাঁও আৰু অৰণ্যসমূহ প্ৰতি বছৰে সংকুচিত হৈ অহাটো এই তথ্যচিত্ৰত অন্তৰ্ভুক্ত কৰা হৈছে।

বহুতো ধাননি পথাৰ, মেটেকাভৰা পুখুৰী, ঘোঁৰাই টনা নাঙল, পৰিভ্ৰমী চৰাই, কপাহ খেতি আৰু নৱ-বৈষ্ণৱ সংস্কৃতিৰ স্থান হৈছে এই মাজুলী।

১,৩৬০ একৰ অনুৰ্বৰ ভূমিক ডাঠ অৰণ্যলৈ পৰ্যৱসিত কৰা যাদব পায়েঙে তথ্যচিত্ৰখনত খহনীয়াৰ কাৰকসমূহ আঙুলিয়াই দি বৃক্ষ ৰোপনৰ ওপৰত জোৰ দিছে।