বুঢ়ীদিহিং নদীৰ গৰাখহনীয়াই লিডু অঞ্চলৰ প্ৰতি কঢ়িয়াইছে প্ৰৱল ভাবুকি

তিনিচুকীয়া জিলাৰ বিভিন্ন জাতি-জনগোষ্ঠীৰ মিলনভূমি লিডু অঞ্চল। ১২৪ নং মাৰ্ঘেৰিটা বিধানসভা সমষ্টিৰ অন্তৰ্গত এই অঞ্চলটোলৈ বুঢ়ীদিহিং নদীৰ গৰাখহনীয়াই প্ৰৱল ভাবুকি কঢ়িয়াই আনিছে।

আজি মাৰ্ঘেৰিটা সাংবাদিক সংস্থাৰ উদ্যোগত আৰম্ভ হোৱা পঞ্চায়তে পঞ্চায়তে ‘অ আমাৰ গাঁও’ কাৰ্যসূচীৰ অংশবিশেষ হিচাপে শামুকজান গাঁও পঞ্চায়তৰ মোলাং গাঁওস্থিত টিৰাপমুখ প্ৰাথমিক বিদ্যালয়ত পঞ্চায়তখনৰ সচেতন ৰাইজৰ সৈতে সাংবাদিকৰ এক মতবিনিময় অনুষ্ঠানত বিভিন্নজনে এই আশংকা ব্যক্ত কৰে।

সংস্থাৰ সভাপতি ৰাম প্ৰসাদ আম্বেদকাৰৰ পৌৰহিত্যত অনুষ্ঠিত মতবিনিময় অনুষ্ঠানত ৰাইজে সদৰী কৰা মতে বুঢ়ী দিহিং নদীৰ প্ৰৱল গৰাখহনীয়াত শামুকজান গাঁও পঞ্চায়তৰ মোলাং, মোলাং ৰিজাৰ্ভ, মোলাং খামতি আদি গাঁৱৰ ৫০০ৰো অধিক বিঘা কৃষি ভূমি নদীৰ বুকুত জাহ গৈছে।

আনহাতে প্ৰতিবছৰৰ বাৰিষাত মোলাং ৰিজাৰ্ভ গাঁও বানাক্ৰান্ত হ’ব লগা হয়। উল্লেখযোগ্য যে অতি ভয়াবহ ৰূপ ধাৰণ কৰা নদীখনৰ এটা অংশত পানী নিগৰ্মণৰ বাবে থকা শ্লুইচ গেটখনৰো জৰাজীৰ্ণ অৱস্থা হৈছে। কেনেবাকৈ এই গেটখন ভাঙি গলে সমগ্র লিডু অঞ্চলৰ এক বৃহৎ অংশলৈ ভাবুকি নামি অহাৰ সম্ভাৱনা আছে।

মাৰ্ঘেৰিটা সাংবাদিক সংস্থাৰ সাধাৰণ সম্পাদক ৰাণাজ্যোতি নেওগে আঁত ধৰা আৰু প্ৰশান্ত চেতিয়া, মানস প্ৰতীম গগৈ, শ্যামল নেওগ, অভিজিৎ চাংমাই আদি সংস্থাৰ সকলো বিষয়ববীয়া উপস্থিত থকা অনুষ্ঠানটোত পঞ্চায়তবাসী ৰাইজে অতি শীঘ্ৰে বুঢ়ীদিহিং নদীৰ গৰাখহনীয়া প্ৰতিৰোধৰ ব্যৱস্থা কৰিবলৈ চৰকাৰক দাবী জনায়।