ডিব্ৰুগড়ত অনুজ্ঞাপত্ৰহীন পিষ্টল উদ্ধাৰ; দুজনক আটক

ডিব্ৰুগড় ৰে’লৱেই ষ্টেইশ্যনৰ সমীপৰ বাণীপুৰত আজি কেন্দ্ৰীয় সংৰক্ষিত আৰক্ষী বাহিনীৰ এটা দলে এজন লোকৰ পৰা বিদেশত নিৰ্মিত এটা অনুজ্ঞাপত্ৰহীন পিষ্টল আৰু গুলী উদ্ধাৰ কৰে।

আটকাধীন অভিযুক্ত ব্যক্তিজনক তিনিচুকীয়া জিলাৰ শদিয়া মহকুমাৰ চুণপাৰা গাঁৱৰ বাসীন্দা মনোৰঞ্জন বৰুৱা(৩২) বুলি চিনাক্ত কৰা হৈছে।

এই সংক্ৰান্তত লোকজনৰ সহযোগী কেশৱ ছেত্ৰীকো আটক কৰা হৈছে বুলি ডিব্ৰুগড় থানাৰ ভাৰপ্ৰাপ্ত বিষয়া শিদ্ধেশ্বৰ বৰাই জানিবলৈ দিয়ে।

তেওঁ কোৱা মতে কেন্দ্ৰীয় সংৰক্ষিত আৰক্ষী বাহিনীৰ ১৭১নং বেটেলিয়নৰ এটা তহলদাৰী দলে আজি পুৱাৰ ভাগত ডিব্ৰুগড় ৰে’লৱেই ষ্টেইশ্যনৰ সমীপত সন্দেহজনক অৱস্থাত ৰখাই থোৱা এ এছ-০৬- চি-৭৩১৭ নম্বৰৰ এখন বগা ৰঙৰ মাৰুটি কাৰৰ ভিতৰত দুজন লোকক সুৰাপান কৰি থকা দেখা পাই।

পিছত লোকদুজনক তালাচী চলোৱাত মনোৰঞ্জন বৰুৱাৰ কবলৰ পৰা এটা ইটালীত নিৰ্মিত অনুজ্ঞাপত্ৰহীন পিষ্টল আৰু ১৯ জাঁই সক্ৰিয় গুলী উদ্ধাৰ কৰা হয় বুলি আৰক্ষী বিষয়া গৰাকীয়ে সদৰী কৰে।

আনহাতে, লক্ষণীয় যে অভিযুক্ত মনোৰঞ্জন বৰুৱাই নিজকে অৰুণাচল প্ৰদেশৰ ইটানগৰ সমষ্টিৰ বিধায়ক টেচি কাছোৰ গাড়ীচালক বুলি পৰিচয় দিছে। অৱশ্যে তেওঁ কৰা দাবীৰ সত্যতা নিশ্চিত হোৱা নাই।

ধৃত লোকদুজনক ন্যায়িক জিম্মালৈ প্ৰেৰণ কৰা হৈছে বুলি তেওঁ লগতে জানিবলৈ দিয়ে।