ৰাজ্যৰ স্বাস্থ্য বিভাগ ক’ৰ’নাক লৈ সজাগ হোৱাৰ সময়তে খানাপাৰাস্থিত অসম কৃষি বিশ্ববিদ্যালয়ৰ চৌহদৰ চিকিৎসালয়ত তলা

সমগ্ৰ বিশ্বত ক’ৰ’না ভাইৰাছৰ ফলত ২৫০০০-ত কৈ অধিক লোকে প্ৰাণ হেৰুওৱাৰ লগতে প্ৰায় ছয় লাখ লোক এই ভাইৰাছৰ সংক্ৰমণৰ কবলত পৰিছে।

ভাৰতৰ লগতে অসম চৰকাৰেও ক’ৰ’না ভাইৰাছৰ সংক্ৰমণ ৰোধৰ বাবে দেশৰ সকলো চিকিৎসালয়ক সতৰ্ক হৈ থকাৰ বাবে বিভিন্ন পদক্ষেপ গ্ৰহণ কৰাৰ লগতে চিকিৎসা কৰ্মসকলৰ চুটী বাতিল কৰিছে।

অসম চৰকাৰৰ স্বাস্থ্য মন্ত্ৰী হিমন্ত বিশ্ব শৰ্মাই চিকিৎসা খণ্ডত বিভিন্ন গুৰুত্বপূৰ্ণ ঘোষণা কৰাৰ লগতে এই মহাদুৰ্যোগৰ সময়ত স্বাস্থ্য বিভাগৰ কোনো কৰ্মচাৰীকে বিশেষ অসুবিধা নাথাকিলে ছুটী দিয়া নহ’ব বুলি ঘোষণা কৰিছে ।

ক’ৰ’না ভাইৰাছৰ বাবে দেশৰ সকলো চিকিৎসালয়ে বিশেষ পদক্ষেপ গ্ৰহণ কৰাৰ সময়ত ৰাজ্যৰ স্বাস্থ্য বিভাগৰ নিৰ্দেশক বুঢ়া আঙুলী দেখুৱাই মহানগৰীৰ খানাপাৰাস্থিত অসম কৃষি বিশ্ববিদ্যালয়ৰ চৌহদত থকা চিকিৎসালয়ত তলা ওলমি আছে।

অসম কৃষি বিশ্ববিদ্যালয়ৰ ডীন ডঃ বিবেকানন্দ শইকীয়াই জনোৱা মতে চিকিৎসালয়খনৰ চিকিৎসক ক্ৰমে ডঃ আলিফা বেগম আৰু ডঃ যোগীৰাজ দাসে দীৰ্ঘ দিন ধৰি চিকিৎসালয়ত উপস্থিত নাই ।

যাৰ ফলত বিশ্ববিদ্যালয় খনৰ প্ৰায় দুইসহস্ৰাধিক চৌহদবাসীয়ে উপযুক্ত চিকিৎসাৰ পৰা বঞ্চিত হৈ আছে ।

চিকিৎসক দুগৰাকীক ফোনতহে বিচাৰিবলগীয়া হয় বুলিও শইকীয়াই লগতে কয়।

‘‘তেওঁলোকক ফোনত হে বিচাৰিবলগীয়া হয়। যাৰ বাবে চিকিৎসালয় খনৰ সন্মুখৰ বেৰত ফোন নং সহ বেনাৰ আৰি দিয়া হৈছে,’’শইকীয়াৰ মন্তব্য।

উল্লেখযোগ্য যে, বিশ্ববিদ্যালয়খনৰ চিকিৎসালয়ৰ বেৰত  লগাই থোৱা বেনাৰত এনেদৰে লিখা আছে, ‘‘চিকিৎসালয়লৈ অহাৰ আগত চিকিৎসকক যোগাযোগ কৰিব।’’  তাৰ পিছত লিখি থোৱা আছে চিকিৎসক দুজনক দুজনৰ যোগাযোগৰ নম্বৰ ।

আনহাতে, অসম কৃষি বিশ্ববিদ্যালয় কতৃপক্ষই চিকিৎসক দুজনক জাননী প্ৰেৰণ কৰে যদিও বিশ্ববিদ্যালয় কৰ্তৃপক্ষক গুৰুত্ব নিদি চিকিৎসালয়ত অনুপস্থিত থাকে চিকিৎসক দুয়োগৰাকী ।

জানিব পৰা মতে, নিজৰ দায়িত্ব আৰু কৰ্তব্য পাহৰি চিকিৎসক দুজনে ব্যক্তিগত খণ্ডৰ আগশাৰীৰ চিকিৎসালয় সমূহত অধিক ধনৰ বিনিময়ত কাম কৰে ।

আমাৰ সাংবাদিকে চিকিৎসক দুজনক যোগাযোগ কৰে যদিও চিকিৎসক আলিফা বেগমৰ যোগাযোগ নম্বৰটি নিস্ক্ৰিয় হৈ থকাৰ বিপৰীতে যোগীৰাজ দাসক লগ ধৰিব খোজাত তেওঁ কাইলৈ আগতীয়াকৈ ফোন কৰি লগ ধৰিবলৈ কয়।

যি সময়ত চিকিৎসা মহাবিদ্যালয়সমূহ ক’ৰ’না চিকিৎসালয়লৈ উন্নীতকৰণৰ বাবে চৰকাৰে ব্যৱস্থা গ্ৰহণ কৰি ৰাজ্যৰ জনসাধাৰণক প্ৰাথমিক চিকিৎসাৰ বাবে ওচৰৰ চিকিৎসালয়সমূহলৈ যোৱাৰ  বাবে আহ্বান জনাইছে তেনে সময়ত গুৱাহাটীৰ মহানগৰীৰ খানাপাৰাস্থিত অসম কৃষি বিশ্ববিদ্যালয়ৰ চৌহদৰ চিকিৎসালয়খনত তলা ওলমি থকা কাৰ্য্যই সকলোকে আশ্বৰ্য্যচকিত কৰি তুলিছে।