স্কটিছ ফুটবল ক্লাব মাডাৰৱেল এফ চিয়ে ধীৰাজক আগবঢ়ালে তিনি বছৰীয়া চুক্তিৰ প্ৰস্তাৱ  

ভৱিষ্যতৰ সন্ধানত স্কটলেণ্ডলৈ উৰা মৰা মণিপুৰ তথা দেশৰ এগৰাকী প্ৰতিভাৱান ফুটবল গ’লকীপাৰ ধীৰাজ সিং সম্পৰ্কত এটা ভাল খবৰ আহিছে। স্কটিছ লীগৰ প্ৰথম ডিভিজনৰ দল মাডাৰৱেল এফ চি য়ে ১৮ বছৰীয়া খেলুৱৈগৰাকীক আবঢ়াইছে তিনি বছৰীয়া চুক্তিৰ প্ৰস্তাৱ ।

‘এতিয়ালৈ কোনোধৰণৰ চুক্তি হোৱা নাই। এয়া কেৱল প্ৰস্তাৱহে। যদিহে ধীৰাজে ৱৰ্ক পাৰ্মিট পায় তেন্তে ক্লাৱটোৰ হৈ চুক্তিবদ্ধ হ’ব’, এইদৰে ধীৰাজ সিঙৰ নিকটতম সতীৰ্থ অনুজ কিছলুৱে জানিবলৈ দিয়ে।

উল্লেখ্য যে যোৱা ফেব্ৰুৱাৰি মাহতে স্কটলেণ্ডৰ মাডাৰৱেল ক্লাবলৈ অনুশীলনৰ বাবে যোৱা ধীৰাজে এতিয়া দলটোৰ সৈতে চুক্তিবদ্ধ হ’বলৈ অপেক্ষা কৰিব লাগিব জুন মাহলৈ। কিয়নো ব্ৰিটেইনত পেছাদাৰী খেলুৱৈ হ’বলৈ হ’লে ৱৰ্ক পাৰ্মিটৰ প্ৰয়োজন হয়, আৰু ইয়াৰ বাবে খেলুৱৈৰাকীৰ বয়স ১৮ বছৰ হোৱাৰ উপৰি অন্যান্য চৰ্তাৱলীৰ প্ৰয়োজন।

এই পাৰ্মিট পাবলৈ হ’লে খেলুৱৈগৰাকীয়ে কেতবোৰ চৰ্ত পূৰণ কৰিবলগীয়া হয়। খেলুৱৈগৰাকীয়ে প্ৰতিনিধিত্ব কৰা দেশখন ফিফা ৰেংকিঙৰ ৭০ নম্বৰ স্থানৰ কম হ’ব লাগিব আৰু দ্বিতীয়তে খেলুৱৈগৰাকীয়ে যোৱা দুটা বছৰত দেশে ভাগ লোৱা আন্তৰ্জাতিক খেলৰ কমেও ৭৫ শতাংশ খেলত ভাগ ল’ব লাগিব।

‘কিন্তু ধীৰাজ সিঙে ইয়াৰ এটাও চৰ্ত পূৰণ কৰা নাই। প্ৰথম পৰ্যায়ত ক্লাবটোৰ সৈতে চুক্তি হোৱাৰ আশা মাত্ৰ ১০ শতাংশহে। কিন্তু পৰৱৰ্তী চিজনৰ বাবে ৱৰ্ক পাৰ্মিট পোৱাৰ সম্ভাৱনা আছে’, এইদৰে উল্লেখ কৰে কিছলুৱে।

যি নহওক, বাস্তৱত ধীৰাজৰ বাবে ক্লাবটোৰ সৈতে চুক্তিবদ্ধ হোৱাটো কিছু অসম্ভৱ যেণ লাগিছে যদিও ক্লাব আৰু ধীৰাজ পক্ষই এই সম্পৰ্কত কিবা এটা সমধান সূত্ৰ উলিযাব পাৰিব বুলি ভাৰতৰ সকলো ফুটবল প্ৰেমী আশাবাদী।

উল্লেখ্য যে ১৭ অনুৰ্ধ ফুটবল বিশ্বকাপত ভাৰতীয় দলৰ হৈ গ’লৰক্ষকৰ দায়িত্ব গ্ৰহণ কৰা ধীৰাজে প্ৰতিযোগিতাখনত উন্নতমানৰ প্ৰদৰ্শন দাঙি ধৰিছিল যাৰ পৰিণতিতে মাডাৰৱেল এফ চিৰ প্ৰশিক্ষকে ধীৰাজক এই বাচনি শিবিৰলৈ আমন্ত্ৰণ কৰিছিল।