মহাৰাষ্ট্ৰত ফুটব্ৰীজ খহি ৰেলপথত বাগৰি পৰিল যাত্ৰী: এগৰাকী নিহত, আহত ২০ গৰাকী

মহাৰাষ্ট্ৰৰ চন্দ্ৰপুৰত দেওবাৰে সংঘটিত হয় এক ভয়াৱহ দুৰ্ঘটনা। চন্দ্ৰপুৰৰ বল্লাৰ শ্বাহ ৰেল ষ্টেচনত সন্ধিয়া প্ৰায় ৫ বজাত এখন ফুটব্ৰীজৰ স্লেব ভাঙি পৰাৰ ফলত এগৰাকী লোক নিহত হোৱাৰ লগতে ২০ গৰাকী আহত হয়।

এই ভয়াৱহ দুৰ্ঘটনাৰ সময়ত ফুটব্ৰীজখনৰ ওপৰেৰে বহু লোকে খোজ কাঢ়ি আছিল। অতৰ্কিতে ফুটব্ৰীজখন খহি পৰাৰ ফলত বহুকেইগৰাকী ব্যক্তি তলৰ ৰেলপথত বাগৰি পৰে।

ৰে’ল আৰক্ষীয়ে জানিবলৈ দিয়া মতে পুনে অভিমুখী ৰে’লত উঠিবলৈ বহু যাত্ৰীয়ে ফুটব্ৰীজেৰে তললৈ অহাৰ সময়তে হঠাতে এটা অংশ খহি পৰে। ফলত একাংশ লোক প্ৰায় ২০ ফুট তলৰ ৰেলপথত পৰি যায়।

অৱশ্যে সেই সময়ত ট্ৰেকত কোনো ৰেল চলাচল হৈ থকা নাছিল বাবে অধিক হতাহতি হোৱাৰ পৰা ৰক্ষা পৰে। দুৰ্ঘটনাত এগৰাকী ব্যক্তিয়ে প্ৰাণ হেৰুওৱাৰ বিপৰীতে প্ৰায় ২০ গৰাকী আহত হয়।

#WATCH | Slabs fall off of a foot over bridge at Balharshah railway junction in Maharashtra’s Chandrapur; people feared injured pic.twitter.com/5VT8ry3ybe

— ANI (@ANI) November 27, 2022

আহতসকলৰ ৮ গৰাকী ব্যক্তিৰ অৱস্থা সংকটজনক বুলি জানিব পৰা গৈছে। ৰে’লৱেৰ বিভাগীয় বিষয়াই জানিবলৈ দিয়া মতে দুৰ্ঘটনাৰ পাছতে তাৎক্ষণিকভাৱে চিকিৎসালয়লৈ প্ৰেৰণ কৰা হয়।

ইফালে ৰেলৱেই গুৰুতৰভাৱে আঘাতপ্ৰাপ্ত লোকৰ বাবে ১ লাখ টকা, আৰু সামান্য আঘাতপ্ৰাপ্ত লোকৰ বাবে ৫০ হাজাৰ টকাৰ ক্ষতিপূৰণ ঘোষণা কৰে।

আহত ব্যক্তিসকলৰ উপযুক্ত চিকিৎসাৰ বাবে অসামৰিক চিকিৎসালয়ৰ পৰা উন্নত আন চিকিৎসালয়লৈ স্থানান্তৰিত কৰা হৈছে বুলি ৰেলৱে বিষয়াগৰাকীয়ে লগতে উল্লেখ কৰে।