পিছলিল মাস্ক! বিশ্বৰ ধনাঢ্য ব্যক্তিৰ তালিকাত মাস্কক পিছ পেলাই শীৰ্ষত আন এগৰাকী ধনকুবেৰ

হঠাৎ কিছু সময়ৰ বাবে পতন ঘটিল ধনকুবেৰ এলন মাস্কৰ। বিশ্বৰ ধনাঢ্য ব্যক্তি হিচাপে দীৰ্ঘদিন ধৰি নিজৰ স্থান শীৰ্ষত ৰখা মাস্কৰ অৱনমন ঘটিল দ্বিতীয় স্থানলৈ। টুইটাৰ আৰু টেছলাৰ চিইঅ’ মাস্কক পিছলৈ ঠেলি তালিকাৰ শীৰ্ষলৈ আগবাঢ়িল আন এগৰাকী ধনকুবেৰ।

টেছলাৰ শ্বেয়াৰ হ্ৰাস পোৱাৰ লগতে টুইটাৰত ৪৪ বিলিয়ন ডলাৰৰ বিনিয়োগৰ ফলত আজি হঠাতে হ্ৰাস পায় মাস্কৰ সম্পত্তি। তেওঁৰ ঠাইত শীৰ্ষত আৰোহণ কৰে বিলাসী ব্ৰেণ্ড লুই ভিটনৰ মূল কোম্পানী এলভিএমএইচৰ মুখ্য কাৰ্যবাহী বাৰ্নাৰ্ড আৰ্নল্টে।

ফৰ্বছৰ তালিকাত ১৮৫.৩ বিলিয়ন ডলাৰৰ সম্পত্তিৰে শীৰ্ষস্থান দখল কৰে আৰ্নল্ট। অৱশ্যে কিছু সময় পিছতে নিজৰ হেৰুওৱা স্থান পুনৰুদ্ধাৰ কৰে মাস্কে। ১৮৫.৭ বিলিয়ন ডলাৰৰ সম্পত্তিৰে পুনৰ শীৰ্ষস্থানলৈ উন্নীত হয় মাস্ক।

২০২১ চনৰ ছেপ্টেম্বৰ মাহত আমাজনৰ প্ৰতিষ্ঠাপক জেফ বেজোছক ধনৱন্ত ব্যক্তিৰ তালিকাৰ শীৰ্ষস্থানৰ পৰা আঁতৰাই স্থান অধিগ্ৰহণ কৰাৰ পিছৰে পৰা এলন মাস্কে বিশ্বৰ আটাইতকৈ ধনী ব্যক্তিৰ খিতাপ দখল কৰি আহিছে।

২০২২ চনত টেছলাৰ শ্বেয়াৰ দুবছৰৰ ভিতৰত সৰ্বনিম্ন স্তৰলৈ নামি অহাৰ লগে লগে ইতিমধ্যে মাস্কৰ সম্পত্তি ২০০ বিলিয়ন ডলাৰৰ তললৈ হ্ৰাস পাইছে। আনহাতে যোৱা মাহত ৪৪ বিলিয়ন ডলাৰত মাস্কে অধিগ্ৰহণ কৰিছে ছ’চিয়েল মিডিয়া নেটৱৰ্ক টুইটাৰ।

উল্লেখ্য যে টেছলা আৰু টুইটাৰৰ উপৰিও ধনকুবেৰ মাস্ক ৰকেট কোম্পানী স্পেচএক্স আৰু নিউৰালিংকৰো মুৰব্বী।