কাশ্মীৰত ভাৰত জোড়ো যাত্ৰা: ৰাহুল গান্ধীৰ দেহত প্ৰথমবাৰলৈ দেখা পোৱা গ’ল জেকেট

প্ৰায় সামৰণি পৰাৰ দিশে অগ্ৰসৰ হৈছে ভাৰত জোড়ো যাত্ৰা। বিগত বৰ্ষৰ ৮ ছেপ্টেম্বৰৰ পৰা ৰাহুল গান্ধীৰ নেতৃত্বত আৰম্ভ হোৱা এই পদযাত্ৰাই অৱশেষত প্ৰৱেশ কৰিছে কাশ্মীৰত। পূৰ্ব নিৰ্ধাৰিত সূচী অনুসৰি কাশ্মীৰতেই সামৰণি পৰিব কংগ্ৰেছৰ এই ভাৰত জোড়ো যাত্ৰা।

বৃহস্পতিবাৰে পঞ্জাৱৰ পৰা জম্মুত প্ৰৱেশ কৰাৰ সময়ত ‘ভাৰত জোড়ো যাত্ৰা’ৰ এই দীৰ্ঘদিনীয়া কাৰ্যসূচীৰ কালছোৱাত প্ৰথমবাৰৰ বাবে ৰাহুল গান্ধীক দেখিবলৈ পোৱা ঠাণ্ডা প্ৰতিহত কৰিব পৰা পোচাকত।

যাত্ৰাৰ সময়ছোৱাত প্ৰচণ্ড ঠাণ্ডাকো নেওচি কেৱল টি-চাৰ্ট পিন্ধি উত্তৰ ভাৰতৰ মাজেৰে পদযাত্ৰা কৰা গান্ধীক আজি প্ৰথমবাৰৰ বাবে জেকেট পৰিধান কৰা দেখিবলৈ পোৱা গ’ল। পুৱাৰে পৰা জম্মুৰ কেইবাটাও অঞ্চলত পাতলীয়া বৰষুণৰ বাবে অৱশেষত গান্ধীয়ে গৰম পোচাক পৰিধান কৰিব লগা হয় বুলি সন্দেহ কৰা হৈছে।

অৱশ্যে পিছত তেওঁ দেহৰ পৰা জেকেটটো খুলি লোৱা দেখা পোৱা গৈছে আৰু প্ৰতিদিনৰ দৰেই কেৱল বগা টি-চাৰ্ট পৰিধান কৰিয়েই পুনৰ যাত্ৰা কৰা দেখিবলৈ পোৱা গৈছিল। উল্লেখ্য যে যাত্ৰাৰ সময়ত গান্ধীৰ এই পোচাকক কেন্দ্ৰ কৰি ৰাজনৈতিক অৰিয়াঅৰিৰো সৃষ্টি হৈছিল।

শাসকীয় বিজেপিয়ে গান্ধীৰ টি-চাৰ্টৰ দৰৰ বিষয়ে উল্লেখ কৰি কটুক্তি কৰাৰ সমান্তৰালভাৱে প্ৰতি আক্ৰমণ চলাইছিল কংগ্ৰেছে। ৰাষ্ট্ৰীয় ৰাজনীতি তথা সংবাদ মাধ্যমত ৰাহুল গান্ধীৰ এই পোচাকত পৰিচ্ছদক লৈ চলিছিল ব্যাপক চৰ্চা।

পিছে এই সকলো চৰ্চাক আওকাণ কৰি ৰাহুল গান্ধীয়ে তেওঁৰ টি-চাৰ্টৰ ওপৰত গুৰুত্ব দিয়াতকৈ তেওঁৰ সৈতে যাত্ৰাত সংগ দিয়া দৰিদ্ৰ কৃষক-শ্ৰমিক সকলৰ পোচাকলৈ গুৰুত্ব দিবলৈ আহ্বান জনাইছিল ৰাজনৈতিক দল তথা সংবাদ মাধ্যমক।

উল্লেখ্য যে এতিয়ালৈকে ১২৫ দিনীয়া যাত্ৰাত প্ৰায় ৩৪০০ কিলোমিটাৰ পথ অতিক্ৰম কৰিছে ৰাহুল গান্ধীৰ নেতৃত্বৰ ভাৰত জোড়ো যাত্ৰাই। অহা ২৫ জানুৱাৰীত জম্মু-কাশ্মীৰৰ ৰামবান জিলাৰ বাণীহালত ৰাষ্ট্ৰীয় পতাকা উত্তোলন কৰিব গান্ধীয়ে।

তাৰ দুদিন পিছতে ২৭ জানুৱাৰীত অনন্তনাগ হৈ যাত্ৰাৰ অন্তিম গন্তব্যস্থান শ্ৰীনগৰত প্ৰৱেশ কৰিব পদযাত্ৰাই।