বিশিষ্ট অসমীয়া চলচ্চিত্ৰ পৰিচালক গুণসিন্ধু হাজৰিকাৰ দেহাৱসান

বিশিষ্ট চলচ্চিত্ৰ পৰিচালক গুণসিন্ধু হাজৰিকাৰ দেহাৱসান ঘটিছে। গুৱাহাটীৰ হেঙেৰাবাৰীৰ নিজা বাসভৱনত শনিবাৰে শেষ নিশ্বাস ত্যাগ কৰে হাজৰিকাই। কেইবাখনো জনপ্ৰিয় অসমীয়া ছবি পৰিচালনাৰ সৈতে জড়িত গুণসিন্ধু হাজৰিকাই দীৰ্ঘদিন ধৰি সাংস্কৃতিক জগতৰ সকলোৰে অলক্ষিতে এক উপেক্ষিত জীৱন কটাইছিল।

ষাঠিৰ দশকত মুম্বাইত ৰাজ কাপুৰৰ ছবিত স্পট বয় হিচাপে চলচ্চিত্ৰত জগতত খোজ দিছিল গুণসিন্ধু হাজৰিকাই। কাৰিকৰী দিশত দক্ষতা থকা হাজৰিকাই সেই সময়ত ছবি পৰিচালনাৰ বাবে উপযুক্ত পৰিৱেশ আৰু সহযোগিতা পোৱা নাছিল।

তেওঁ সন্ধ্যাৰাগ, অণিৰ্বান, মণিৰাম দেৱান, আদালত, মৰমী. তৰামাই আদি কেইবাখনো ছবিৰ সহকাৰী পৰিচালক আছিল।

পৰিচালকগৰাকীয়ে ‘অবুজ বেদনা’ নামৰ ছবিখন পৰিচালনা কৰিছিল। অবুজ বেদনা ছবিখন পৰৱৰ্তী সময়ত হিন্দীলৈ ডাবিং কৰা হৈছিল। ছবিখন দূৰদৰ্শনৰ ৰাষ্ট্রীয় কাৰ্যক্রমতো দেখুওৱা হৈছিল।

অসমীয়াৰ উপৰিও তেওঁ হিন্দী আৰু ভোজপুৰী ছবিৰ পৰিচালনাৰ সৈতে জড়িত আছিল। তেওঁ বলিউডৰ ছবি ‘কানুন ৰং লায়েগী’ৰ সহ-পৰিচালক থকাৰ উপৰি ভোজপুৰী ভাষাৰ ‘গৌৰী’ নামৰ ছবিখন পৰিচালনা কৰিছিল।

বিশিষ্ট চলচ্চিত্ৰ পৰিচালক গুণসিন্ধু হাজৰিকাৰ ১৯৩০ চনত নগাঁৱৰ কামপুৰৰ তেতেলিসৰা গাঁৱত জন্ম হৈছিল। এখন ছবিৰ সম্পাদনাৰ কাম চলি থকাৰ সময়ত এক দুৰ্ঘটনাত পতিত হৈ দৃষ্টি শক্তি হেৰুৱাইছিল হাজৰিকাই।