দেশৰ আকাশত উৰিল ৰুছ ক্ষেপনাস্ত্ৰ; সংকটৰ মাজতে পতন ১৮ মহীয়া মলদোভা চৰকাৰৰ

মলদোভাৰ প্ৰধানমন্ত্ৰী নাটালিয়া গাব্ৰিলিতাই ইউক্ৰেইন বনাম ৰাছিয়ান যুদ্ধৰ আৰম্ভণিৰ পৰাই ভলোডিমিৰ জেলেনস্কিৰ দেশৰ কাষত থিয় দিছিল। তেওঁ ইউৰোপীয় ইউনিয়নৰ বন্ধু হিচাপে পৰিচিত হৈ উঠিছিল। কিন্তু শুকুৰবাৰে দেশখনৰ আকাশৰ ওপৰেৰে কেইবাটাও ৰাছিয়াৰ ক্ষেপনাস্ত্ৰ উৰি যোৱা দেখি তেওঁ খৰখেদাকৈ প্ৰধানমন্ত্ৰী পদৰ পৰা পদত্যাগ কৰে।

নাটালিয়াই পদত্যাগ কৰাৰ পিছত সংবাদ মাধ্যমক কয় যে মূল্যবৃদ্ধিকে ধৰি কেইবাটাও সংকটৰ সৈতে যুঁজি থকা দেশখনৰ দায়িত্ব তেওঁ আৰু চম্ভালিব নোৱাৰে। ইউক্ৰেইন যুদ্ধৰ প্ৰভাৱ আৰু অৰ্থনৈতিক অস্থিৰতাৰ মাজত ১৮ মাহৰ ক্ষমতাৰ অৰিয়াঅৰিৰ পিছত মলদোভাৰ পশ্চিমপন্থী চৰকাৰে পদত্যাগ কৰে।

প্ৰধানমন্ত্ৰীয়ে তেওঁৰ প্ৰতিৰক্ষা উপদেষ্টা আৰু প্ৰাক্তন অভ্যন্তৰীণ মন্ত্ৰী ডৰিন ৰেচান ডৰিনক দেশৰ পৰৱৰ্তী প্ৰধানমন্ত্ৰী হিচাপে প্ৰস্তাৱ দিছে।

অহা সপ্তাহত সংসদৰ অধিৱেশন আহ্বান কৰি ৰেচানক আনুষ্ঠানিকভাৱে প্ৰধানমন্ত্ৰী হিচাপে বাছনি কৰা হ’ব। তেওঁ অতি সোনকালেই সংসদৰ অনুমোদন লাভ কৰিব বুলি আশা কৰা হৈছে।

মলদোভাক ইউৰোপৰ আটাইতকৈ দৰিদ্ৰ দেশ বুলি জনা যায়। নাটালিয়া গাব্ৰিলিতাই ২০২১ চনৰ আগষ্টত দেশৰ প্ৰধানমন্ত্ৰী হৈছিল। তেওঁ এজন কট্টৰ ৰাছিয়ান বিৰোধী বুলি জনা যায়। ৰাছিয়াই ইউক্ৰেইনৰ বিৰুদ্ধে যুদ্ধ ঘোষণা কৰাৰ পিছৰে পৰা মলদোভা চৰকাৰ গভীৰ সমস্যাত পৰিছে।

ঘোষিত শত্ৰু ইউৰোপীয় ইউনিয়নৰ সৈতে সংগতি ৰাখি মস্কোৱে মলদোভালৈ গেছৰ যোগান সম্পূৰ্ণৰূপে বন্ধ কৰি দিছিল। দেশখনে শক্তি সংকটৰ সন্মুখীন হোৱাৰ লগে লগে অত্যাৱশ্যকীয় সামগ্ৰীৰ মূল্য আকাশচুম্বী হৈ পৰিছিল। ফলস্বৰূপে, সাধাৰণ লোকসকলৰ মাজত চৰকাৰৰ বিৰুদ্ধে ক্ষোভ বৃদ্ধি পাইছিল।