একজোঁট বিৰোধী! অনাস্থা প্ৰস্তাৱৰ সন্মুখীন হ’ব লোকসভাৰ অধ্যক্ষ ওম বিৰলা!

শীঘ্ৰেই অনাস্থা প্ৰস্তাৱৰ সন্মুখীন হ’ব পাৰে লোকসভাৰ অধ্যক্ষ ওম বিৰলা। সূত্ৰ অনুসৰি, বিৰলাৰ বিৰুদ্ধে বিৰোধী দলসমূহে আনিব পাৰে অনাস্থা প্ৰস্তাৱ। অহা সোমবাৰেই বিৰলাৰ বিৰুদ্ধে অনাস্থা প্ৰস্তাৱ উত্থাপন হ’ব পাৰে বুলি বাতৰি প্ৰকাশ পাইছে।

ৰাষ্ট্ৰীয় সংবাদ মাধ্যমৰ বাতৰি অনুসৰি, লোকসভাৰ অধ্যক্ষগৰাকীৰ বিৰুদ্ধে এই প্ৰস্তাৱ অনাৰ প্ৰচেষ্টাত বিৰোধী দলসমূহক নেতৃত্ব দিছে কংগ্ৰেছ দলে। এই প্ৰস্তাৱ উত্থাপন কৰিবলৈ বিৰোধী দলসমূহক লোকসভাৰ নূন্যতম ৫০ গৰাকী সাংসদৰ সমৰ্থনৰ প্ৰয়োজন।

এই নূন্যতম সমৰ্থকৰ সংখ্যাত উপনীত হোৱাৰ উদ্দেশ্যে কংগ্ৰেছ দলে আন বিৰোধী দলৰ সমৰ্থন সংগ্ৰহৰ চেষ্টা চলাই আছে বুলি দাবী কৰা হৈছে। কংগ্ৰেছ নেতা ৰাহুল গান্ধীৰ লোকসভা সদস্য পদ খাৰিজ সন্দৰ্ভত এই অনাস্থা প্ৰস্তাৱ উত্থাপনৰ বাবে সাজু হোৱা বুলি জানিব পৰা গৈছে।

সদনত বিৰোধী দলৰ সদস্যক মাত মতাৰ ক্ষেত্ৰত বাধা দিয়াৰ অভিযোগৰ লগতে মানহানিৰ গোচৰত দোষী সাব্যস্ত হোৱাৰ মাত্ৰ ২৪ ঘণ্টাৰ পিছতে ৰাহুল গান্ধীক লোকসভাৰ পৰা অযোগ্য ঘোষণা কৰালৈকে বিৰোধী দলসমূহে আন কিছু বিষয়ক লৈ অনাস্থা প্ৰস্তাৱ আনিব পাৰে।