মণিপুৰত অব্যাহত হিংসা! গুলীচালনাত ২ জন সাধাৰণ নাগৰিক নিহত; ৬টা ঘৰত অগ্নিসংযোগ

মণিপুৰত অস্ত্ৰধাৰী দুষ্কৃতিকাৰীৰ গুলীত আঘাতপ্ৰাপ্ত দুজন সাধাৰণ নাগৰিকৰ পিছত মৃত্যু হোৱা বুলি শুকুৰবাৰে আৰক্ষীয়ে প্ৰকাশ কৰে।

মণিপুৰৰ বিষ্ণুপুৰ জিলাৰ ফৌগাকচাও ইখাই মানিং লেইকাইত অচিনাকি দুষ্কৃতিকাৰীয়ে ছটা ঘৰত অগ্নিসংযোগ কৰে বুলিও আৰক্ষীয়ে এক বিবৃতিত প্ৰকাশ কৰিছে।কেন্দ্ৰীয় বাহিনী আৰু আৰক্ষীয়ে ততাতৈয়াকৈ ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে।

ৰাজ্যখনৰ পৰিস্থিতি এতিয়াও অস্থিৰ আৰু উত্তেজনাপূৰ্ণ যদিও নিয়ন্ত্ৰণত আছে বুলি এগৰাকী বিষয়াই জানিবলৈ দিয়ে।

লগতে পঢ়ক: গাৰ নোম শিয়ৰি উঠা কাণ্ড! স্বামীক হত্যাৰ পিছত দেহ পাঁচ টুকুৰা কৰি পুখুৰীত পেলাই দিলে পত্নীয়ে

বিবৃতিটোত কোৱা হৈছে যে ২৫ জুলাইত হেইকোল আৰু ফৌগাকচাও ইখাই অঞ্চলত অস্ত্ৰধাৰী দুষ্কৃতিকাৰীৰ গুলীত আঘাতপ্ৰাপ্ত এজন সাধাৰণ নাগৰিকে শুকুৰবাৰে মৃত্যুক সাৱটি লয়।

২৭ জুলাইত ফৌগাকচাও ইখাই, কাংবাই, হেইকল, আৰু তেৰাখংছাংবি অঞ্চলত অস্ত্ৰধাৰী দুষ্কৃতিকাৰীৰ গুলীচালনাৰ ঘটনা সংঘটিত হয় য’ত দুজন নিৰাপত্তাৰক্ষীকে ধৰি সাতজন লোক আহত হয়। আহত লোকসকলৰ ভিতৰত এজন সাধাৰণ নাগৰিকে শুকুৰবাৰে মৃত্যুক সাৱটি লয়।

বিবৃতিটোত কোৱা হৈছে যে ৰাজ্যৰ আৰক্ষী আৰু নিৰাপত্তা বাহিনীয়ে এতিয়ালৈকে বিভিন্ন পাহাৰ আৰু উপত্যকা অঞ্চলত মুঠ ৩১১টা বাংকাৰ ধ্বংস কৰিছে।

লগতে পঢ়ক: চাইবাৰ অপৰাধ! ইউটিউব লাইক কৰি ৭০০ কোটিৰো অধিক টকা হেৰুৱালে ১৫ হাজাৰৰো অধিক ভাৰতীয়ই

বিবৃতিটোত লগতে কোৱা হৈছে যে ৰাজ্যখনৰ স্পৰ্শকাতৰ আৰু ভিতৰুৱা এলেকাত ৰাজ্যৰ আৰক্ষী আৰু নিৰাপত্তা বাহিনীয়ে তালাচী অভিযান চলাইছে।