স্বাধীনতা দিৱসৰ প্ৰস্তুতি : সীমান্তৱৰ্তী অঞ্চলত আৰক্ষী-কমাণ্ডোৰ ব্যাপক তালাচী অভিযান

আগন্তুক স্বাধীনতা দিৱসক লৈ তৎপৰ হৈ পৰিছে গোৱালপাৰা জিলাৰ আৰক্ষী প্ৰশাসন।

স্বাধীনতা দিৱসৰ ব্যাপক প্ৰস্তুতিৰ লগতে গোৱালপাৰা জিলা প্ৰশাসনে নিৰাপত্তা ব্যৱস্থা অধিক কটকটীয়া কৰি তুলিছে।

জিলা খনৰ আৰক্ষী অধীক্ষক সুশান্ত বিশ্ব শৰ্মাৰ নিৰ্দেশত আৰক্ষী আৰু কমাণ্ডো বাহিনীয়ে সৰু বৰ সকলো পথৰ লগতে মেঘালয় সংযোগী ৰাষ্ট্ৰীয় পথতো চলাইছে ব্যাপক তালাচী ৷

কোনো উগ্ৰপন্থী অথবা কোনো কুটাঘাতকাৰীয়ে যাতে জিলাখনত কুটাঘাত সংঘটিত কৰিব নোৱাৰে তাৰ বাবে আৰক্ষীয়ে তীক্ষ্ন দৃষ্টি ৰাখিছে।

ইপিনে, বিগত কেইবাবছৰো ধৰি আলফাৰ উপ সেনাধ্যক্ষ দৃষ্টি ৰাজখোৱাই মেঘালয়ৰ দুৰ্গম অঞ্চলত বাহৰ পাতি থকা খবৰ লাভ কৰাৰ পাছৰে পৰা সীমান্তৱৰ্তী অঞ্চল সমূহত আৰক্ষী কমাণ্ডো সষ্টম হৈ পৰিছে।

অসম -মেঘালয়  সংযোগী আটাইকেইটা পথতে আৰক্ষীয়ে যানবাহন সমূহ সুক্ষ্মভাৱে নিৰীক্ষণ কৰাৰ লগতে সন্দেহ জনক লোকৰ ওপৰত চোকা নজৰ ৰাখিছে ৷