চাঞ্চল্য! দিল্লীৰ পথৰ মাজতে ই-কমাৰ্চ প্লেটফৰ্ম আমাজনৰ বিষয়াক গুলীয়াই হত্যা

এক চাঞ্চল্যকৰ হত্যাকাণ্ডই জোকাৰি গৈছে দেশৰ ৰাজধানী দিল্লী। পথৰ মাজতে আততায়ীয়ে গুলীয়াই হত্যা কৰিছে ই-কমাৰ্চ প্লেটফৰ্ম আমাজনৰ মেনেজাৰ হিচাপে কৰ্মৰত এগৰাকী যুৱকক।

মঙলবাৰে মাজনিশা সংঘটিত হয় এই ভয়াৱহ ঘটনা। আৰক্ষীয়ে জানিবলৈ দিয়া মতে, হৰপ্ৰীত গিল নামৰ যুৱকগৰাকী তেওঁৰ এক বন্ধুৰ সৈতে যাত্ৰা কৰাৰ সময়ত অতৰ্কিতে তেওঁলোকৰ ওপৰত ভয়ানক আক্ৰমণ হয়।

আৰক্ষীৰ মতে, ভজনপুৰা অঞ্চলৰ সুভাষ বিহাৰৰ সমীপত পাঁচজনীয়া অচিনাক্ত দুৰ্বৃত্তৰ এটা দলে বাইক আৰোহী দুই বন্ধুক আগচি ধৰে আৰু তেওঁলোকৰ ওপৰত নিৰ্বিচাৰ গুলীচালনা কৰে।

এই আক্ৰমণত এটা গুলীয়ে হৰপ্ৰীতৰ মূৰত আঘাত কৰে আৰু ইয়াৰ ফলত তেওঁৰ থিতাতে মৃত্যু হয়। আনহাতে তেওঁৰ বন্ধু গোবিন্দ সিঙৰ সোঁ কাণত গুলীয়ে আঘাত হানে।

আঘাতপ্ৰাপ্ত গোবিন্দ সিং বৰ্তমান লোকনায়ক হাস্পতালত চিকিৎসাধীন হৈ আছে বুলি আৰক্ষীয়ে জানিবলৈ দিছে।

ইফালে আৰক্ষীয়ে ঘটনাস্থলীৰ চিচিটিভি কেমেৰাৰ ফুটেজ পৰীক্ষা কৰি দোষীক চিনাক্ত কৰিছে। আটাইকেইগৰাকী অভিযুক্ত বৰ্তমান পলাতক অৱস্থাত আছে বুলি আৰক্ষীয়ে সদৰী কৰিছে।