কাম শেষ, চন্দ্ৰপৃষ্ঠত শুই পৰিব বিক্ৰম-প্ৰজ্ঞান; পুনৰ কেতিয়া সাৰ পাব ভাৰতৰ চন্দ্ৰযান?

দেওবাৰৰ পৰা চন্দ্ৰপৃষ্ঠত শুই পৰিব ভাৰতৰ চন্দ্ৰযান ৩। অৱতৰণ কৰাৰ পিছত লেণ্ডাৰ বিক্ৰম আৰু ৰ’ভাৰ প্ৰজ্ঞানে চন্দ্ৰৰ হিচাপত এটা দিন কাম কৰিছে। এতিয়া সূৰ্যাস্তৰ সময় আহি গৈছে। সেয়ে ইছৰ’ই কৈছে যে এতিয়া যন্ত্ৰপাতিবোৰক শুবলৈ পঠিওৱা হ’ব। অৱশ্যে এই টোপনিৰ পাছত ভাৰতৰ চন্দ্ৰযানে পুনৰ সাৰ পাই কাম কৰিবলৈ সক্ষম হ’ব নে নাই তাক লৈ প্ৰশ্ন উত্থাপন হৈছে। চন্দ্ৰযানে দেওবাৰে চন্দ্ৰত অৱতৰণৰ ১২ দিন সম্পূৰ্ণ কৰিব।

ইছৰোৰ প্ৰকল্প সঞ্চালক পি ৱেৰামুথুভেলে কয় যে ৰ’ভাৰ প্ৰজ্ঞানে নিৰ্দিষ্ট কৰা সকলো কাম কৰিছে। চন্দ্ৰৰ পৰা সংগ্ৰহ কৰা সকলো তথ্য লেণ্ডাৰৰ জৰিয়তে পৃথিৱীত উপস্থিত হৈছে।

লগতে পঢ়ক: India Squad for ODI World Cup 2023: সঞ্জু আউট, ৰাহুল-ঈশান ইন! বিচিচিআইয়ে চূড়ান্ত কৰিলে বিশ্বকাপৰ বাবে ভাৰতীয় দল!

দেওবাৰৰ পৰা সকলো ডিভাইচৰ বাবে স্লিপ মোড অন কৰা হৈছে। কিন্তু এই মোডটো কাৰ্যকৰী হ’বলৈ কিছু সময় লাগিব। অনুমান কৰা হৈছে যে দেওবাৰে বিয়লিৰ পৰা লেণ্ডাৰ বিক্ৰম আৰু ৰ’ভাৰ প্ৰজ্ঞানে লাহে লাহে জিৰণি ল’ব।

প্ৰথমতে জানিব পৰা গৈছিল যে চন্দ্ৰযান ১৪ দিন চন্দ্ৰৰ মাটিত কাম কৰিব। তেনেহ’লে প্ৰজ্ঞানে ১২ দিনৰ মূৰত কিয় টোপনিৰ দেশলৈ গৈ আছে?

ৱেৰামুথুভেলে কয়, “সূৰ্য্য উদয়ৰ শূন্য ডিগ্ৰী কোণৰ পৰাই আৰম্ভ হয় চন্দ্ৰৰ দিনটো। কিন্তু আমাৰ চন্দ্ৰ অভিযানৰ বাবে আমাক কমেও ৬ ডিগ্ৰী সূৰ্যৰ পোহৰৰ প্ৰয়োজন। অন্যথা কেমেৰাৰ ছবিবোৰত বিশাল ছাঁ থাকিব, যাৰ ফলত ছবিবোৰ ম্লান হৈ পৰিব। গতিকে প্ৰজ্ঞানে সম্পূৰ্ণ ৰাতিলৈকে কাম কৰিব নোৱাৰিব।”

লগতে পঢ়ক: ভুল অস্ত্ৰোপচাৰ! প্লাষ্টিক চাৰ্জাৰী কৰিয়েই প্ৰাণ হেৰুৱালে জনপ্ৰিয় মডেল-অভিনেত্ৰীয়ে

এই বিশ্ৰামৰ পিছত ভাৰতৰ চন্দ্ৰযান পুনৰ নিজৰ মহিমালৈ ঘূৰি আহিবনে? ইছৰোৰ বিজ্ঞানীসকলে কয় যে সৌৰশক্তি সংগ্ৰহ কৰি প্ৰজ্ঞান সম্পূৰ্ণৰূপে কাৰ্যক্ষম হৈ উঠিছে। ২২ ছেপ্টেম্বৰত পুনৰ উদয় হ’ব চন্দ্ৰ। যদি প্ৰজ্ঞানে চন্দ্ৰৰ চৰম ঠাণ্ডা সহ্য কৰি ইছৰোলৈ সংকেত প্ৰেৰণ কৰিব পাৰে, তেন্তে পুনৰ নতুন তথ্য জানিব পৰা যাব। যদি নহয় তেন্তে চন্দ্ৰৰ দক্ষিণ মেৰু বিজয়ৰ প্ৰতীক হিচাপে প্ৰজ্ঞান চন্দ্ৰৰ পৃষ্ঠতে থাকি যাব।