বেটেৰে নহয়, হাতেৰে ৰচিলে কোহলীয়ে আন এক অভিলেখ: অতিক্ৰম কুম্বলেক

২০১১ৰ পুনৰাবৃত্তিৰ লক্ষ্যৰে আজি ২২ গজৰ মহাৰণত ৰণশিঙা বজাইছে ভাৰতে। সমুখত পাঁচবাৰৰ বিশ্ব চেম্পিয়ন শক্তিশালী অষ্ট্ৰেলিয়া। উত্থান-পতনৰ মাজেৰে আগবঢ়া মেচখনত অৱশ্যে সম্প্ৰতি শক্তিশালী স্থিতিতে আছে ভাৰতীয় দল।

চেন্নাইৰ এম এ চিদাম্বৰম ষ্টেডিয়ামত চলি থকা এই মেচখনত ভাৰতীয় দলৰ ৰাজহাড় স্বৰূপ কোহলীয়ে পুনৰ এবাৰ ত্ৰাণকৰ্তাৰ ৰূপত অৱতীৰ্ণ হৈ আগবঢ়াই নিছে ভাৰতীয় দলক। কোহলীৰ লগতে ৰাহুলৰ ধৈৰ্যশীল বেটিঙৰ সুবাদত লক্ষ্যৰ দিশত আগবাঢ়িছে ভাৰত।

পিছে বেট হাতত লৈ ক্ৰীজত নমাৰ পূৰ্বেই কোহলীয়ে ৰচিছে আন এক অভিলেখ। সাধাৰণতে কোহলীৰ ক্ষেত্ৰত অভিলেখ শব্দটো কোনো নতুন নহয় যদিও আজিৰ এই অভিলেখ কিছু ব্যতিক্ৰম। কিয়নো এইবাৰ এই অভিলেখ সৃষ্টি হোৱা নাই কোহলীৰ বেটেৰে।

ভাৰতীয় বলিং আক্ৰমণৰ সন্মিলিত নিখুঁত আক্ৰমণত ১৯৯ ৰাণতে ইনিংছ সামৰা অষ্ট্ৰেলিয়াৰ ইনিংছত কোহলীয়ে ধৰিছিল দুটাকৈ কেচ। এই কেচ দুটাৰে কোহলীয়ে ৰচে বিশ্বকাপৰ ইতিহাসত সৰ্বাধিক কেচ ধৰা ভাৰতীয় ক্ৰিকেটাৰৰ অভিলেখ।

এই ক্ষেত্ৰত কোহলীয়ে অতিক্ৰম কৰে ভাৰতৰ কিংবদন্তি স্পিনাৰ অনিল কুম্বলেক। আজিৰ মেচ আৰম্ভ হোৱাৰ পূৰ্বে কুম্বলে-কোহলী দুয়ো ১৪ টাকৈ কেচ আয়ত্ত কৰি যুটীয়াভাৱে এই অভিলেখৰ অধিকাৰী হৈ আছিল।

আজি অৱশ্যে অষ্ট্ৰেলিয়ান অপেনাৰ মিচেল মাৰ্শ্ব আৰু টেইল এণ্ডাৰ বেটাৰ আডাম জাম্পাৰ কেচ ধৰি এই অভিলেখ নিজৰ নামলৈ আনে কোহলীয়ে। লক্ষণীয়ভাৱে কুম্বলেই মাত্ৰ ১৮ খন মেচত ১৪ টা কেচৰ কৃতিত্ব লভাৰ বিপৰীতে এই ৰেকৰ্ড ভংগৰ বাবে কোহলীক প্ৰয়োজন হয় ২৭খন মেচৰ।