বাংলাদেশত ভয়াৱহ ৰে’ল দুৰ্ঘটনা: দুই ৰে’লৰ সংঘৰ্ষত ১৫ জনৰ মৃত্যু, শতাধিক আহত

এক ভয়াৱহ ৰে’ল দুৰ্ঘটনাই জোকাৰি গৈছে চুবুৰীয়া ৰাষ্ট্ৰ বাংলাদেশ। দুখন ৰে’লৰ সংঘৰ্ষৰ পৰিণতিত ১৫ জন লোকৰ মৃত্যু হোৱাৰ লগতে শতাধিক লোক আহত হোৱাৰ খবৰ প্ৰকাশ পাইছে।

এই দুৰ্ঘটনা সংঘটিত হৈছে কিশোৰগঞ্জ জিলাৰ ভৈৰৱ চহৰত। প্ৰকাশিত খবৰ অনুসৰি, এখন মালবাহী ৰে’লে বিপৰীত দিশত গৈ থকা এখন যাত্ৰীবাহী ৰে’লত খুন্দা মৰাৰ ফলত সংঘটিত হয় দুৰ্ঘটনাটো।

এই সংঘৰ্ষৰ ফলশ্ৰুতিত দুয়োখন ৰে’ল লাইনচ্যুত হয়। জিলাখনৰ এগৰাকী উচ্চপদস্থ প্ৰশাসনিক বিষয়াই সদৰী কৰা মতে, দুৰ্ঘটনাৰ পিছতে তৎকালীন উদ্ধাৰ অভিযানত ১৫টা মৃতদেহ উদ্ধাৰ কৰা হয়।

দুৰ্ঘটনাত ১০০তকৈও অধিক লোক আহত হোৱা বুলি উল্লেখ কৰি তেওঁ লগতে বাগৰি পৰা ডবাৰ তলত বহু লোক আবদ্ধ হৈ থকা বুলি সদৰী কৰে আৰু এনে পৰিস্থিতিত মৃত্যুৰ সংখ্যা বৃদ্ধি পাব বুলি সন্দেহ প্ৰকাশ কৰে।

বিষয়াগৰাকীয়ে জানিবলৈ দিয়া মতে, বিয়লি প্ৰায় ৪:০০ বজাত সংঘটিত হৈছিল এই দুৰ্ঘটনাটো। একেটা লাইনতে দুয়োখন ৰে’লে যাত্ৰা কৰাৰ ফলতে দুৰ্ঘটনাৰ সূত্ৰপাত হয় বুলি তেওঁ সদৰী কৰে।