তুষাৰাবৃত সৌন্দৰ্যৰ দৰ্শক হ’ব বিচাৰে নেকি? তেতিয়াহ’লে ভ্ৰমণ তালিকাত ৰাখক দেশৰ এই স্থানসমূহ

বৈচিত্ৰ্যময় ভাৰতত আছে পৰ্যটনৰ বিপুল সম্ভাৰ। সংস্কৃতি বা পৰম্পৰা, ভূ-প্ৰকৃতি বা প্ৰাকৃতিক দৃশ্যই হওক, পৰ্যটকৰ মনত সুকীয়া স্থান দখল কৰিব পৰাকৈ অনন্য সুন্দৰ আকৰ্ষণ আছে দেশৰ প্ৰতিটো কোণত।

সাধাৰণতে ভাৰতত নৱেম্বৰৰ পৰা মাৰ্চ মাহৰ মাজভাগলৈকে শীতকাল বিৰাজমান হৈ থাকে। এই সময়ছোৱাত দেশৰ কিছু কিছু স্থানত তুষাৰপাত হোৱা পৰিলক্ষিত হয়। প্ৰাকৃতিক সৌন্দৰ্যই আকৰ্ষণ কৰা পৰ্যটকৰ বাবে সাধাৰণতেই তুষাৰাবৃত স্থান আকৰ্ষণৰ কেন্দ্ৰবিন্দু হৈ পৰে

গতিকে এই সময়ছোৱাত তুষাৰাবৃত সৌন্দৰ্যৰ দৃষ্টিনন্দন দৃশ্যৰ সাক্ষী হ’বলৈ ভ্ৰমণ কৰিব পৰা দেশৰ কেইখনমান বিশেষ ঠাই চাওঁ আহক:

১/ কাশ্মীৰ

ভাৰতৰ উত্তৰ প্ৰান্ত কাশ্মীৰক সততে ‘ভূ-স্বৰ্গ’ বুলি কোৱা হয়। শীতকালত এই অঞ্চলত প্ৰচণ্ড বৰফ পৰে, যাৰ ফলত এই ভূখণ্ড শীতকালত এক মনোমোহা সৌন্দৰ্যৰ আধাৰলৈ ৰূপান্তৰিত হয়।

কাশ্মীৰৰ শ্ৰীনগৰ, গুলমাৰ্গ, আৰু পহলগাম বৰফ অনুৰাগীৰ বাবে কিছুমান জনপ্ৰিয় গন্তব্যস্থান। বৰফেৰে আবৃত ডাল হ্ৰদৰ অতীতৰ সৌন্দৰ্য আৰু শীতকালীন ক্ৰীড়াত লিপ্ত হোৱাৰ সুযোগে কাশ্মীৰক বৰফ প্ৰেমীসকলৰ বাবে সপোনৰ গন্তব্যস্থান কৰি তুলিছে।

২/ হিমাচল প্ৰদেশৰ ছিমলা

হিমাচল প্ৰদেশৰ ৰাজধানী ছিমলা পৰ্যটকৰ বাবে সদায়ে এক আকৰ্ষণীয় ৰম্যভূমি। শীতকালত চহৰখন বৰফেৰে আবৃত স্বৰ্গলৈ ৰূপান্তৰিত হয়। ছিমলাৰ ৰিজ, মল ৰোড, কুফ্ৰি আদি এনে কিছু ঠাই, য’ত আপুনি বৰফাবৃত সৌন্দৰ্য উপভোগ কৰিব পাৰে।

৩/ হিমাচল প্ৰদেশৰ মানালী

ছিমলাৰ পৰা মাত্ৰ কেইঘণ্টামানৰ যাতায়তৰ দূৰত্বত হিমাচল প্ৰদেশৰ আন এখন সৌন্দৰ্যশালী চহৰ মানালী। এই চহৰখনত বিশেষকৈ ডিচেম্বৰৰ পৰা ফেব্ৰুৱাৰীলৈকে প্ৰচণ্ড বৰফ পৰে। ছ’লাং উপত্যকা স্কীং (Skiing) আৰু স্নোবৰ্ডিঙৰ দৰে শীতকালীন ক্ৰীড়াৰ বাবে এক হটস্পট।

মানালীৰ বৰফেৰে আবৃত প্ৰাকৃতিক দৃশ্যই নব বিবাহিত দম্পতীসকলৰ লগতে দুঃসাহসিক অভিযান পিপাসুসকলৰ বাবে এক নিখুঁত পৰিৱেশ গঢ়ি তোলে।

৪) আউলি, উত্তৰাখণ্ড

আউলি দেশৰ স্কীং (Skiing) ৰাজধানী। এই স্থান স্কি ৰিজৰ্ট আৰু নন্দ দেৱী পৰ্বতমালাৰ নয়নাভিৰাম দৃশ্যৰ বাবে বিখ্যাত। শীতকালত আউলি বৰফেৰে আবৃত হয়, যাৰ বাবে এই স্থান স্কীং, স্নো ট্ৰেকিং আৰু অন্যান্য দুঃসাহসিক ক্ৰীড়া তথা অভিযানৰ বাবে পৰ্যটকৰ পছন্দৰ স্থান হৈ পৰে।

আউলিলৈ কেবল কাৰ যাত্ৰাৰ সময়তো চাৰিওফালৰ বৰফেৰে আবৃত শৃংগবোৰৰ মন্ত্ৰমুগ্ধকৰ দৃশ্যই দৰ্শকক প্ৰতিমুহূৰ্ততে ৰোমাঞ্চিত কৰি তুলিব পাৰে।

৫/ গেংটক, ছিকিম

ছিকিমৰ ৰাজধানী গেংটক শীতকালত হৈ পৰে পৰ্যটকক আদৰণি জনাবলৈ এক সুসজ্জিত বৰফাবৃত মনোমোহা পাহাৰীয়া ষ্টেচন। চহৰখনৰ বিশেষকৈ টছমগো হ্ৰদ আৰু নাথুলা পাছত বৰফৰ সৌন্দৰ্য উপভোগ্য হৈ পৰে।

বৰফেৰে আবৃত মঠবোৰৰ শান্তিময় পৰিৱেশ আৰু ছিকিমৰ আতিথ্যৰ উমালতাই গেংটক যাত্ৰাক আপোনাৰ জীৱনৰ বাবে এক অবিস্মৰণীয় অভিজ্ঞতা কৰি তুলিব পাৰে।