ফলাফলৰ এসপ্তাহৰ অন্তত ছত্তীশগড়ে লাভ কৰিলে মুখ্যমন্ত্ৰী: জনজাতীয় নেতা বিষ্ণু দেও ছাইক মুখ্যমন্ত্ৰীৰ দায়িত্ব

সপ্তাহজোৰা চিন্তা-চৰ্চাৰ অন্তত ছত্তীশগড়ত মুখ্যমন্ত্ৰী নিৰ্বাচিত কৰিলে বিজেপিয়ে। জনজাতীয় নেতা তথা প্ৰাক্তন কেন্দ্ৰীয় মন্ত্ৰী বিষ্ণু দেও ছাইক ছত্তীশগড়ৰ পৰৱৰ্তী মুখ্যমন্ত্ৰী হিচাপে নিৰ্বাচিত কৰিছে বিজেপিয়ে।

আজি বিয়লি ৫৪ গৰাকী নৱনিৰ্বাচিত বিধায়কৰ বৈঠকত বিজেপিৰ বিধায়িনী দলৰ নেতা হিচাপে নিৰ্বাচিত হয় বিষ্ণু দেও ছাই।উল্লেখ্য যে, ৰাজ্যখনত অন্যান্য পিছপৰা শ্ৰেণীৰ জনসংখ্যা সৰ্বাধিক হোৱাৰ বিপৰীতে জনসংখ্যাৰ দিশৰ পৰা জনজাতীয় লোক দ্বিতীয় সৰ্বাধিক।

এনে পৰিস্থিতিয়ে প্ৰথম অৱস্থাত ৰাজ্যখনত মুখ্যমন্ত্ৰী নিৰ্বাচনৰ বিষয়ত কিছু সমস্যাৰ উদ্ভৱ হৈছিল বিজেপিৰ অভ্যন্তৰত। অৱশেষত ৰাজ্যখনৰ জনজাতীয় প্ৰধান অঞ্চলসমূহত দলৰ প্ৰদৰ্শনৰ পৰিপ্ৰেক্ষিতত জনজাতীয় নেতাৰ পক্ষত সিদ্ধান্ত লয় বিজেপিয়ে।

লক্ষনীয়ভাৱে ৫৯ বছৰীয়া ছাইক বিজেপিৰ মতাদৰ্শগত গুৰু ৰাষ্ট্ৰীয় স্বয়ংসেৱক সংঘৰ ঘনিষ্ঠ বুলিও জনা যায়। ইয়াৰ উপৰিও তেওঁ ৰাজ্যৰ ভিতৰতে দলটোৰ আটাইতকৈ জনপ্ৰিয় নেতা হিচাপে পৰিগণিত হোৱা প্ৰাক্তন মুখ্যমন্ত্ৰী ৰমন সিঙৰ ঘনিষ্ঠ।

চাৰিবাৰকৈ সাংসদ হিচাপে কাৰ্যনিৰ্বাহ কৰা ছাই ২০২০ চনৰ পৰা ২০২২ চনলৈ বিজেপিৰ ছত্তীশগড় প্ৰদেশৰ সভাপতি হিচাপে কাৰ্যনিৰ্বাহ কৰিছিল। দলৰ সাংগঠনিক কাম-কাজত অগ্ৰণী হিচাপে পৰিচিত হোৱাৰ লগতে বিতৰ্কহীন ভাবমূৰ্তিৰ বাবেও ছাইক অগ্ৰাধিকাৰ দিয়া হয়।

ইয়াৰ পূৰ্বে তেওঁ বিজেপিৰ ৰাষ্ট্ৰীয় কাৰ্যনিৰ্বাহক সমিতিৰ সদস্য হিচাপে কাৰ্যনিৰ্বাহ কৰি আহিছে। ২০১৪ চনত নৰেন্দ্ৰ মোদী চৰকাৰ ক্ষমতালৈ অহাৰ সময়ত তেওঁক তীখাৰ ৰাজ্যিক মন্ত্ৰী হিচাপে নিযুক্তি দিয়া হৈছিল।