দিল্লী সুৰা নীতি গোচৰত বি আৰ এছ নেত্ৰী কে কবিতাক গ্ৰেপ্তাৰ ইডিৰ

দিল্লী সুৰা নীতি কেলেংকাৰী গোচৰত এইবাৰ কেন্দ্ৰীয় তদন্তকাৰী সংস্থা এনফ’ৰ্চমেণ্ট ডাইৰেক্টৰেটে গ্ৰেপ্তাৰ কৰিছে তেলেংগানাৰ পূৰ্বৰ শাসকীয় দল ভাৰত ৰাষ্ট্ৰ সমিতিৰ নেত্ৰী তথা প্ৰাক্তন মুখ্যমন্ত্ৰী কে চন্দ্ৰশেখৰ ৰাওৰ কন্যা কে কবিতাক।

বি আৰ এছৰ নেত্ৰীগৰাকীক গ্ৰেপ্তাৰ কৰাৰ পাছতে ইডিয়ে তেওঁক দিল্লীলৈ লৈ যোৱা বুলি জানিব পৰা গৈছে। আজি এনদ’ৰ্চমেণ্ট ডাইৰেক্টৰেটে নেত্ৰীগৰাকীৰ বাসভৱনত অভিযান চলোৱাৰ পিছতে গ্ৰেপ্তাৰ কৰে। ইতিপূৰ্বে তদন্ত সংস্থাটোৱে চলিত বৰ্ষত দুবাৰকৈ চমন জাৰি কৰিছিল কবিতাক।

কিন্তু দুয়োবাৰেই কে কবিতাই ইডিৰ চমন অগ্ৰাহ্য কৰিছিল। বিগত বৰ্ষত কবিতাক এই গোচৰৰ সন্দৰ্ভত তিনিবাৰকৈ জেৰা কৰা হৈছিল। আনকি তদন্তকাৰী সংস্থাটোৱে তেওঁৰ বক্তব্যও প্ৰিভেনচন অৱ মানি লণ্ডাৰিং এক্ট (পিএমএলএ)ৰ অধীনত লিপিবদ্ধ কৰিছিল।

কে কবিতাই ইডিৰ অভিযোগ অস্বীকাৰ কৰি নিজকে নিৰ্দোষী বুলি দাবী কৰি আহিছে। তাৰ পৰিৱৰ্তে তেওঁ বিজেপি নেতৃত্বাধীন কেন্দ্ৰীয় চৰকাৰে তেলেংগানাত প্ৰৱেশৰ স্বাৰ্থত কেন্দ্ৰীয় সংস্থাসমূহৰ অপব্যৱহাৰ কৰাৰ অভিযোগ উত্থাপন কৰিছে।

উল্লেখ্য যে দিল্লী সুৰা নীতি গোচৰৰ অন্যতম অভিযুক্ত অমিত অৰোৰাই জেৰাৰ সময়ত কে কবিতাৰ নাম উল্লেখ কৰিছিল। একেটা গোচৰতে দিল্লীৰ মুখ্যমন্ত্ৰী অৰবিন্দ কেজৰিৱাললৈও একাধিক চমন জাৰি কৰিছে তদন্তকাৰী সংস্থাটোৱে।

কিন্তু কেজৰিৱালে তেওঁৰ বিৰুদ্ধে জাৰি কৰা প্ৰতিবাৰৰ চমন অগ্ৰাহ্য কৰি আহিছে। কেজৰিৱালৰ দলীয় সতীৰ্থ তথা দিল্লীৰ প্ৰাক্তন উপ-মুখ্যমন্ত্ৰী মনীষ চিছ’দিয়া বিগত এবছৰতকৈ অধিক সময় ধৰি এই গোচৰত কাৰাৰুদ্ধ হৈ আছে।