ধুবুৰীত পথ দুৰ্ঘটনাত নিহত এগৰাকী স্কুলীয়া ছাত্ৰী, আহত আন দুগৰাকী

ধুবুৰী জিলাৰ ছাগলীয়া আৰক্ষী চকীৰ অন্তৰ্গত ৩১ নং ৰাষ্ট্ৰীয় ঘাইপথত থকা ছাগলীয়া গাওঁ পঞ্চায়তৰ কাষত বুধবাৰে ৰাতিপুৱা এখন ই-ৰিক্সাৰে আহি থকা অৱস্থাত পিছপিনৰ পৰা এখন মাৰুতি ছুইফট ডিজায়াৰে(এ এছ ১৭-জি-৫৬৭৬ নম্বৰৰ) খুন্দিওৱাৰ ফলত এগৰাকী ১১ বছৰীয়া স্কুল ইউনিফৰ্ম পৰিহিত কিশোৰী নিহত হোৱাৰ লগতে আন দুজনী আহত হয়।

কিশোৰীগৰাকীয়ে তেওঁলোকৰ ছাগলীয়া আদৰ্শ প্ৰাক্-উচ্চ মাদ্ৰাছা বিদ্যালয়লৈ ই-ৰিক্সাৰে গৈ থকাৰ সময়তে দুৰ্ঘটনাটো সংঘটিত হয়।

দুৰ্ঘটনাটোত গোলকগঞ্জ থানাৰ অন্তৰ্গত ছোট দীঘলটাৰিৰ বাসিন্দা ১১ বছৰীয়া ষষ্ঠ শ্ৰেণীৰ ছাত্ৰী আৰিফা খাতুন ঘটনাস্থলীতে নিহত হয়। আনহাতে, দুৰ্ঘটনাত গুৰুতৰভাৱে আহত দুজনক গোলকগঞ্জ থানাৰ অন্তৰ্গত ছাগলীয়া গাঁৱৰ ১২ বছৰীয়া লাফিকা অঞ্জুমা আৰু ১১ বছৰীয়া আনিছা খাতুন বুলি চিনাক্ত কৰা হৈছে।

ধুবুৰী সদৰৰ উপ-আৰক্ষী অধীক্ষক ভাস্কৰ ওজাই জনোৱা মতে আৰিফা খাতুনৰ মৃতদেহ ধুবুৰী অসামৰিক চিকিৎসালয়ত মৰণোত্তৰ পৰীক্ষা কৰাৰ পিছত পৰিয়ালক চমজাই দিয়া হৈছে। আনহাতে আহত ছাত্ৰী দুগৰাকী ধুবুৰী অসমাৰিক চিকিৎসালয়ত চিকিৎসাধীন হৈ আছে।

ওজাই জানিব দিয়া মতে স্থানীয় লোকে ৩১নং ৰাষ্ট্ৰীয় ঘাইপথ বন্ধ কৰি দিয়াৰ উদ্দেশ্যেৰে ছাগলীয়া আৰক্ষী চকীত সমবেত হৈছিল যদিও আৰক্ষীয়ে পৰিস্থিতি নিয়ন্ত্ৰণ কৰিবলৈ সক্ষম হয়।

প্ৰাথমিক অনুসন্ধানৰ পিছত প্ৰকাশ কৰা মতে দুৰ্ঘটনাটো ছাগলীয়া গাওঁ পঞ্চায়তৰ কাৰ্যালয়ৰ লগতে লাগি থকা নিহত ছাত্ৰীগৰাকীয়ে অধ্যয়ন কৰি থকা বিদ্যালয়খনৰ কাষতে সংঘটিত হয়। ই-ৰিক্সাখন বিদ্যালয় পোৱাৰ মুহূৰ্ততে নিয়ন্ত্ৰণ হেৰুৱাই মাৰুতি ছুইফটখনে ই-ৰিক্সাখনত প্ৰচণ্ড জোৰেৰে খুন্দা মাৰে।

ছাত্ৰী কেইগৰাকী ই-ৰিক্সাখনৰ পৰা ছিটিকি পৰে আৰু আৰিফাই তেওঁৰ ডিঙিত পোৱা গভীৰ আঘাতৰ ফলত ঘটনাস্থলীতে মৃত্যুমুখত পৰে। আৰক্ষীয়ে এই কথা জানিবলৈ দিছে।

নিজৰ পৰিচয় প্ৰকাশত অনিচ্ছুক জিলা পৰিবহন বিষয়াৰ সূত্ৰই কয় যে ধুবুৰী জিলাত পথত চলি থকা ই-ৰিক্সাসমূহৰ আশী শতাংশৰে বৈধ পঞ্জীয়ন নম্বৰ নাই আৰু এই কথা জনাৰ পিছতো বিষয়টোত ৰাজনৈতিক হস্তক্ষেপৰ বাবে বিভাগে কাৰ্য ব্যৱস্থা গ্ৰহণত ব্যৰ্থ হৈছে।