অযোধ্যাত বিজেপিৰ পৰাজয়;অযোধ্যাবাসীক স্বাৰ্থপৰ আখ্যা ৰামায়ণৰ ‘লক্ষণখ্যাত’ সুনীল লাহৰীৰ

ৰামানন্দ সাগৰৰ ৰামায়ণত লক্ষ্মণৰ চৰিত্ৰত অভিনয় কৰা সুনীল লাহৰীয়ে ভাৰতীয় জনতা পাৰ্টিক ভোট নিদিয়াৰ বাবে অযোধ্যাবাসীৰ ওপৰত ক্ষুব্ধ হৈ পৰিছে। বিজেপিৰ শাসনত ৰাম মন্দিৰ প্ৰতিষ্ঠা হোৱাৰ সময়তে অযোধ্যাৰ জনসাধাৰণে সমাজবাদী পাৰ্টিৰ প্ৰাৰ্থী আৱাধেশ প্ৰসাদক ভোট দিছিল। ফলত বিজেপিৰ লাল্লু সিঙে মন্দিৰ থকা ফৈজাবাদ সমষ্টিত পৰাজয় বৰণ কৰে৷

ইনষ্টাগ্ৰাম ষ্ট’ৰীছলৈ লৈ গৈ সুনীলে অযোধ্যাৰ নিৰ্বাচনৰ ফলাফলক লৈ হতাশা প্ৰকাশ কৰে। সুনীলে কয় যে পবিত্ৰ নগৰৰ লোকসকলে “নিজৰ ৰজাক বিশ্বাসঘাতকতা কৰিলে।” অভিনেতাগৰাকীয়েও তেওঁলোকৰ সিদ্ধান্তৰ বাবে জনসাধাৰণক “স্বাৰ্থপৰ” আখ্যা দিয়ে। সুনীলে হিন্দী ভাষাত এটা টোকা শ্বেয়াৰ কৰিছিল, যাৰ অনুবাদ হৈছে, “আমি পাহৰি গৈছো যে এই একেখিনি অযোধ্যা নাগৰিক যিয়ে নিৰ্বাসনৰ পৰা উভতি অহাৰ পাছত দেৱী সীতাক সন্দেহ কৰিছিল। আনকি ঈশ্বৰক অস্বীকাৰ কৰা মানুহক আপুনি কি বুলি কয়? স্বাৰ্থপৰ… অযোধ্যাৰ নাগৰিকে যে সদায় নিজৰ ৰজাক বিশ্বাসঘাতকতা কৰিছিল তাৰ প্ৰমাণ ইতিহাস৷”

ইফালে, বিখ্যাত টেলিভিছন ধাৰাবাহিকখনত ৰামৰ চৰিত্ৰত অভিনয় কৰি পৰিচিত ৰামায়ণৰ সুনীল লাহৰীৰ সহ অভিনেতা অৰুণ গোভিলে উত্তৰ প্ৰদেশৰ মীৰুটৰ পৰা লোকসভা নিৰ্বাচনত প্ৰাৰ্থী হিচাপে থিয় দিছিল। সমষ্টিটোত তেওঁ সমাজবাদী পাৰ্টীৰ প্ৰাৰ্থী সুনীতা ভাৰ্মাক ১০,৫৮৫ ভোটৰ ব্যৱধানত পৰাস্ত কৰি বিজয়ী হিচাপে আত্মপ্ৰকাশ কৰে।