৩ দিনৰ ভিতৰত তৃতীয়বাৰৰ বাবে জম্মু-কাশ্মীৰত সন্ত্ৰাসবাদী আক্ৰমণ, আহত ৬ জন জোৱান

এটাৰ পাছত আনটো আক্ৰমণৰ সন্মুখীন হৈছে কাশ্মীৰ উপত্যকা। পুনৰ অস্থিৰ হৈ পৰিছে জম্মু-কাশ্মীৰ। ৰিয়াছি আক্ৰমণৰ তিনিদিন নৌহওঁতেই তৃতীয়বাৰৰ বাবে উপত্যকাটোত আক্ৰমণ কৰে উগ্ৰপন্থীয়ে।

মঙলবাৰে নিশা জম্মু-কাশ্মীৰৰ ডোডাত সন্ত্ৰাসবাদীয়ে সেনা ঘাটিত আক্ৰমণ কৰে। এই আক্ৰমণৰ সেনায়ো প্ৰতিক্ৰিয়া প্ৰকাশ কৰে। আৰক্ষীৰ মতে, বৰ্তমান উগ্ৰপন্থী আৰু নিৰাপত্তাৰক্ষীৰ মাজত গুলীয়াগুলী অব্যাহত আছে। এই প্ৰতিবেদন লিখাৰ সময়ত অৰ্থাৎ পুৱা ৯ বজালৈকে দুয়োপক্ষৰ মাজত হোৱা গুলীয়াগুলীত ৫ জন জোৱান আৰু এজন বিশেষ বিষয়া আহত হয়।

জানিব পৰা মতে উগ্ৰপন্থীয়ে সেনা ঘাটিত আক্ৰমণ কৰি পাহাৰৰ ওপৰলৈ পলায়ন কৰে। অৱশ্যে যুটীয়া বাহিনীৰ জোৱানে উগ্ৰপন্থীক খেদি পঠিয়াইছিল। উগ্ৰপন্থীক নিৰ্মূলৰ বাবে বুধবাৰে পুৱাও সেই অঞ্চলত দুয়োপক্ষৰ মাজত গুলীয়াগুলী হয়।

ডোডা জিলাৰ সেনা ঘাটিত আক্ৰমণৰ পূৰ্বে মঙলবাৰে নিশা কথুৱা জিলাৰ হিৰানগৰীৰ এটা ঘৰত প্ৰৱেশ কৰি উগ্ৰপন্থীয়ে গুলীচালনা কৰে। সেই ঘৰৰ মালিকে উগ্ৰপন্থীৰ আক্ৰমণৰ বিষয়ে সেনাক অৱগত কৰিছিল। য’ত সেনাবাহিনী খৰধৰকৈ গাঁও পায়গৈ। পলাতক অৱস্থাত এজন উগ্ৰপন্থীৰ মৃত্যু হয়। এই ঘটনাৰ কেইঘণ্টামানৰ ভিতৰতে পুনৰ ডোডা জিলাৰ সেনা শিবিৰত সন্ত্ৰাসবাদীয়ে আক্ৰমণ কৰে। জম্মু-কাশ্মীৰ মণ্ডলৰ জ্যেষ্ঠ আৰক্ষী বিষয়া আনন্দ জৈনে এই ঘটনা দুটাৰ বিষয়ে অৱগত কৰে।

যোৱা দেওবাৰে জম্মুৰ ৰিয়াছি জিলাৰ কাটৰাস্থিত বৈষ্ণো দেৱী মন্দিৰলৈ শিৱখাৰী মন্দিৰৰ পৰা তীৰ্থযাত্ৰী কঢ়িয়াই অনা বাছত উগ্ৰপন্থীয়ে আক্ৰমণ চলাইছিল। এই আক্ৰমণত ৯ জন তীৰ্থযাত্ৰীৰ মৃত্যু হয়।য’ত ৩৩ জন লোক আহত হয়। তেতিয়াৰ পৰাই ইটোৰ পাছত সিটোকৈ সন্ত্ৰাসবাদী আক্ৰমণ কৰা হৈছে। ইতিমধ্যে দেওবাৰৰ ঘটনাৰ তদন্তৰ দায়িত্ব লৈছে NIAই।