অমৃতকালত বাঢ়িছে দেশ এৰি যোৱা ভাৰতীয়ৰ সংখ্যা; শীৰ্ষ তিনিটা স্থানত প্ৰধানমন্ত্ৰীৰ ৰাজ্য গুজৰাট

ভাৰতত দেশ এৰি যোৱাৰ হেঁপাহ বাঢ়িছে একাংশ ভাৰতীয়ৰ।ভাৰত চৰকাৰৰ বৈদেশিক পৰিক্ৰমা মন্ত্ৰালয়ৰ পৰিসংখ্যা অনুসৰি ৰাজধানী দিল্লী আৰু পঞ্জাবৰ পাছত প্ৰধানমন্ত্ৰী নৰেন্দ্ৰ মোদীৰ ৰাজ্য গুজৰাট এই ক্ষেত্ৰত আগবাঢ়ি আছে।

মন্ত্ৰালয়ৰ তথ্য অনুসৰি বিদেশত পাছপ’ৰ্ট আত্মসমৰ্পণ বা ঘূৰাই দিয়াৰ পৰিসংখ্যাৰ পৰাই ভাৰতীয়সকলে আন দেশৰ নাগৰিকত্ব লোৱাৰ প্ৰৱণতা বৃদ্ধি পোৱাটো লক্ষ্য কৰা হৈছে।

বৈদেশিক পৰিক্ৰমা মন্ত্ৰালয়ে সংসদত দাখিল কৰা এক প্ৰতিবেদন অনুসৰি ২০২২ চনত গুজৰাটৰ ২৪১ জন নাগৰিকে আন দেশৰ নাগৰিকত্ব লৈ ভাৰতীয় পাছপ’ৰ্ট ঘূৰাই দিছিল। যোৱা বছৰ সেই সংখ্যা দুগুণ হৈ ৪৮৫ লৈ বৃদ্ধি পালে৷

আনহাতে, চলিত বৰ্ষৰ মে’ মাহৰ ভিতৰত ২৪৪ জন লোকে অন্য দেশৰ নাগৰিকত্ব লৈ পাছপ’ৰ্ট ঘূৰাই দিছে। ২০১৪ চনৰ পৰা ২০২২ চনৰ ভিতৰত গুজৰাটৰ ২২,৩০০ বাসিন্দাই দেশ এৰি থৈ যায়। দিল্লী আৰু পঞ্জাবৰ ক্ষেত্ৰত এই সংখ্যা ক্ৰমে ৬০ হাজাৰ ৪১৪ আৰু ২৮ হাজাৰ ১১৭। কিন্তু টায়াৰ ৱান ৰাজ্যৰ কম বেছি পৰিমাণে বিদেশী নাগৰিকত্ব লোৱাৰ প্ৰৱণতা থাকে।

বৈদেশিক পৰিক্ৰমা মন্ত্ৰালয়ৰ পৰিসংখ্যা অনুসৰি ৩০ৰ পৰা ৪০ বছৰৰ ভিতৰৰ ধনী লোকৰ মাজত প্ৰব্ৰজনৰ ধাৰা অধিক। কিছুমানে শিক্ষাৰ বাবে বিজনেছ ভিছা লৈ আমেৰিকা, ব্ৰিটেইন, কানাডা, অষ্ট্ৰেলিয়া, ছিংগাপুৰ আদি দেশলৈ গৈ তাতেই নাগৰিকত্ব লৈছিল। মূলতঃ প্ৰদূষণমুক্ত পৰিৱেশত উন্নত জীৱন যাপনৰ লক্ষ্যৰে ধনী লোকৰ এটা অংশই দেশ এৰি গৈছে। এই ধাৰা দিনক দিনে বৃদ্ধি পাইছে। নগৰ সেৱা-আন্তঃগাঁথনিৰ বিশেষজ্ঞৰ মতে ভাৰতৰ চহৰসমূহৰ মানদণ্ড ভিন্ন। দিল্লী, মুম্বাই, চেন্নাই, কলকাতা, বেংগালুৰু, জয়পুৰ বাকী চহৰসমূহে আগবঢ়োৱা সেৱাৰ সমতুল্য নহয়। কিন্তু দেশৰ কোনো চহৰ সেৱা ইউৰোপ, আমেৰিকা, মধ্যপ্ৰাচ্য আৰু ছিংগাপুৰৰ সমতুল্য নহয়।