বৰ্ষাবিঘ্নিত দ্বিতীয়খন মেচতো অদমনীয় সূৰ্য বাহিনী; শ্ৰীলংকাক পৰাস্ত কৰি শৃংখলা দখল ভাৰতৰ

গৌতম গম্ভীৰ নতুনকৈ মুখ্য প্ৰশিক্ষক হোৱাৰ পিছতে শ্ৰীলংকাৰ বিৰুদ্ধে শৃংখলা জয়লাভ কৰি ভাৰতীয় ক্ৰিকেটৰ আন এক বৰ্ণময় যুগৰ আৰম্ভণি হ’ল। বৰ্ষাবিঘ্নিত দ্বিতীয়খন মেচতো সূৰ্যকুমাৰ যাদৱৰ দলটোৱে অনায়াসে জয়লাভ কৰে। ইয়াৰে সৈতে ছিৰিজটোও হস্তগত কৰে।

দেওবাৰে টিম ইণ্ডিয়াই ৭ উইকেটত জয়লাভ কৰে। প্ৰথমে বেটিং কৰি শ্ৰীলংকাই ১৬১ ৰান সংগ্ৰহ কৰে। বৰষুণৰ বাবে বাধা পোৱা খেলখনত ভাৰতৰ লক্ষ্য নিৰ্দ্ধাৰণ কৰা হৈছিল ৮ অভাৰত ৭৮ ৰান। ইয়াক সহজেই অতিক্ৰম কৰিলে ভাৰতীয় বেটছমেনে।

শ্ৰীলংকাই ভাল আৰম্ভণি কৰিছিল যদিও চাপ চম্ভালিব পৰা নাছিল। এটা সময়ত তেওঁলোকে ২ উইকেটত ১৩০ ৰান সংগ্ৰহ কৰিছিল। যদিও শেষত আছালংকা বাহিনীৰ ইনিংছ ১৬১ ৰানতে সমাপ্ত হয়। শ্ৰীলংকাৰ খেলুৱৈৰ ভিতৰত কুশল পেৰেৰা (৫২), পাথুম নিছাংকা আৰু কামিন্দু মেণ্ডিছে (২৬) ৰান পায়।

অৱশ্যে হাৰ্দিক পেটেল, ৰবি বিষ্ণয় আৰু অক্ষৰ পেটেলৰ নিয়ন্ত্ৰিত বলিঙত শ্ৰীলংকা দলে শেষৰ চাৰিটা অভাৰত ৭টা উইকেট হেৰুৱায়।

ইয়াৰ পিছতে বৰষুণৰ বাবে খেলখন বাতিল কৰা হয়। পিছত ভাৰতে বেটিং কৰিবলৈ নমাৰ তিনিটা বল পিছতে ধাৰাসাৰ বৰষুণ আৰম্ভ হয়। খেলখন বহু সময়লৈ বন্ধ হৈ যায়। ফলত খেলখনৰ অভাৰ হ্ৰাস কৰা হয়। ভাৰতৰ লক্ষ্য নিৰ্দ্ধাৰিত হয় ৮ অভাৰত ৭৮ ৰান।

যশস্বী (১৫ বলত ৩০ ৰান), সূৰ্যকুমাৰ (১২ বলত ২৬ ৰান) আৰু হাৰ্দিক পাণ্ডিয়া (৯ বলত ২২ ৰান)ৰ সহায়ত নতুন টিম ইণ্ডিয়াই সহজেই জয়ৰ লক্ষ্যত উপনীত হয়। গৌতম গম্ভীৰেও প্ৰশিক্ষক হিচাপে প্ৰথমবাৰৰ বাবে ছিৰিজ জয়ৰ সোৱাদ পালে।