৭০ সংখ্যক ৰাষ্ট্ৰীয় চলচ্চিত্ৰ বঁটাত জিলিকি উঠিল চাৰিখন অসমীয়া ছবি

শুকুৰবাৰে প্ৰদান কৰা ৭০ সংখ্যক ৰাষ্ট্ৰীয় চলচ্চিত্ৰ বঁটা, ২০২২ত চাৰিখন অসমীয়া ছবিয়ে স্বীকৃতি লাভ কৰিছে।

‘এমুঠি পুথি’ (এ ভেৰী ফিচি ট্ৰিপ)য়ে শ্ৰেষ্ঠ অসমীয়া ছবিৰ সন্মান লাভ কৰে। কুলনন্দিনী মহন্তৰ পৰিচালনাৰে এই ছবিখনৰ প্ৰযোজক আছিল মেটানৰ্মাল মোচন পিকচাৰ্ছ প্ৰাইভেট লিমিটেড।

নবাপন ডেকাৰ পৰিচালনা আৰু এইচ এম প্ৰডাকচনে প্ৰযোজনা কৰা ‘জুন্যোটা’ (শূন্য) ছবিখনে শ্ৰেষ্ঠ চুটি ছবি সন্মান লাভ কৰিছে।

আনহাতে, নন-ফিচাৰ ফিল্ম শাখাৰ দুখন ছবি – ‘বিৰুবালা – উইচ টু পদ্মশ্ৰী’ আৰু ‘হাৰগিলা – দ্য গ্ৰেটাৰ এডজুটেণ্ট ষ্টৰ্ক’ – বিচাৰকৰ বিশেষ উল্লেখ লাভ কৰে।

আইমী বৰুৱা প্ৰডাকচন ছ’চাইটিৰ অধীনত প্ৰযোজিত ‘বিৰুবালা – উইচ টু পদ্মশ্ৰী’ পৰিচালনা কৰিছে আইমী বৰুৱাই। আনহাতে, ‘হাৰগিলা – দ্য গ্ৰেটাৰ এডজুটেণ্ট ষ্টৰ্ক’ পৰিচালনা কৰিছে আই পি এছ পাৰ্থ সাৰথি মহন্তই।

তদুপৰি পৰিচালক ড° ববী শৰ্মা বৰুৱাৰ ‘ছিকাল'(যদিহে গছবোৰে কথা ক’ব পাৰিলেহেঁতেন)ক শ্ৰেষ্ঠ তিৱা ছবিৰ সন্মান প্ৰদান কৰা হৈছে।