‘নাৰীৰ সংজ্ঞা কি?’ এগৰাকী ৰূপান্তৰকামী মহিলাৰ গোচৰত তাৎপৰ্যপূৰ্ণ ব্যাখ্যা অষ্ট্ৰেলিয়াৰ আদালতৰ

নাৰী বুলি কাক কোৱা হয়? নাৰী শব্দটোৰ আক্ষৰিক অৰ্থ কি? অষ্ট্ৰেলিয়াৰ ফেডাৰেল আদালতে এক অভূতপূৰ্ব ৰায়দানত ইয়াৰ উল্লেখযোগ্য ব্যাখ্যা আগবঢ়াইছে।

গোচৰ দাখিল কৰা গৰাকী আছিল ৰূপান্তৰকামী মহিলা ৰক্সান টিকেল। তেওঁ নিজৰ সত্তা আৰু পৰিচয়ক লৈ তেওঁ বহুদিন ধৰি এটা গোচৰ যুঁজি আছিল। শুকুৰবাৰে (২৩ আগষ্ট) অষ্ট্ৰেলিয়াৰ ফেডাৰেল আদালতে এই গোচৰৰ শুনানি গ্ৰহণ কৰি পৰ্যবেক্ষণ কৰে যে, এগৰাকী মহিলা হ’ল এনে এজন ব্যক্তি যি দেখাত এগৰাকী নাৰী। একে সময়তে বুজাই দিয়ে যে এগৰাকী নাৰীৰ পৰিচয় তেওঁৰ লিংগৰ ওপৰত নিৰ্ভৰ নকৰে।

আন্তঃৰাষ্ট্ৰীয় আইন বিশেষজ্ঞসকলৰ মতে অষ্ট্ৰেলিয়াৰ আদালতৰ এই পৰ্যবেক্ষণ অভূতপূৰ্ব। এই পৰ্যবেক্ষণক ভৱিষ্যতে আৰু বহু ক্ষেত্ৰত উদাহৰণ হিচাপে গণ্য কৰা হ’ব।

লগতে পঢ়কঃ ক্ৰিকেটৰ পৰা বিদায় ল’লে শিখৰ ধাৱানে; কোনো ক্ৰিকেটেই আৰু নেখেলে ভাৰতীয় অ’পেনাৰগৰাকীয়ে

‘টিকেল বনাম গিগেল’ আছিল অষ্ট্ৰেলিয়াৰ ফেডাৰেল আদালতৰ প্ৰথমটো গোচৰ যিয়ে এগৰাকী ৰূপান্তৰকামী মহিলাৰ পৰিচয়ক লৈ প্ৰশ্ন উত্থাপন কৰিছিল।

 ‘গিগল ফৰ গাৰ্লছ প্ৰাইভেট লিমিটেড’ সংস্থা আৰু ইয়াৰ মুখ্য কাৰ্যবাহী বিষয়া চেলি গ্ৰ’ভাৰৰ বিৰুদ্ধে গোচৰ তৰিছিল ৰ’ক্সান টিকেল নামৰ এগৰাকী ৰূপান্তৰকামী মহিলাই। তেওঁৰ অভিযোগ আছিল যে ২০২১ চনৰ ছেপ্টেম্বৰ মাহত তেওঁক সংগঠনটোৱে প্ৰতাৰণা আৰু অসন্মান কৰিছিল। তেওঁক গিগেল নামৰ এপটো ব্যৱহাৰ কৰাত নিষেধাজ্ঞা আৰোপ কৰা হৈছিল। এই এপটো কেৱল মহিলাৰ ব্যৱহাৰৰ বাবে আৰু তেওঁক ৰূপান্তৰকামী মহিলা হোৱাৰ বাবে কৰ্তৃপক্ষই নিষেধাজ্ঞা আৰোপ কৰিছিল।

ৰক্সান টিকলে লগতে অভিযোগ কৰে যে তেওঁৰ লিংগ পৰিচয়ক বাৰে বাৰে ঠাট্টা কৰাৰ লগতে এপটোৰ পৰা তেওঁৰ সদস্যপদ বাতিল কৰা হৈছে। তাৰ বাবেই তেওঁ মানসিকভাৱে হতাশ হৈ পৰিছিল। টিকেলে অভিযোগ কৰে যে চেলি গ্ৰভাৰে কেইবাটাও ৰাজহুৱা মন্তব্য কৰি তেওঁৰ ভাবমূৰ্তি কলংকিত কৰিবলৈ চেষ্টা কৰিছে। ক্ষতিপূৰণ হিচাপে তেওঁ দাবী কৰিছিল ১৭ লাখ টকা।

লগতে পঢ়কঃ আৰক্ষীৰ জিম্মাৰ পৰা পলাবলৈ গৈ পুখুৰীত ডুবি মৃত্যু ধিঙৰ ধৰ্ষণ কাণ্ডৰ প্ৰধান অভিযুক্তৰ

আদালতত কোৱা হৈছে যে ৰক্সান টিকেলে লিংগ পৰিৱৰ্তন আৰু হৰম’নৰ চিকিৎসা কৰিছে। বৰ্তমান পৰিয়াল, বন্ধু-বান্ধৱ আৰু কৰ্মক্ষেত্ৰত তেওঁ মহিলা হিচাপে পৰিচিত। তেওঁ মহিলাৰ শৌচাগাৰ ব্যৱহাৰ কৰে।

অভিযুক্ত চেলি গ্ৰভাৰে অৱশ্যে নিজৰ স্থিতিত অটল। ৰক্সান টিকলেক এপটোৰ পৰা নিষিদ্ধ কৰা বুলি স্বীকাৰ কৰে যদিও তেওঁ দাবী কৰে যে টিকেল জৈৱিকভাৱে পুৰুষ, গতিকে নিয়ম অনুসৰি তেওঁক এপটো ব্যৱহাৰ কৰিবলৈ দিয়াটো সম্ভৱ নহয়।

তাৰ পিছতে আদালতত প্ৰশ্ন উত্থাপন হ’ল, তেন্তে নাৰীৰ সংজ্ঞা কি? লিংগ আৰু যৌন পৰিচয় কেনেকৈ নিৰ্ণয় কৰিব পাৰি? অষ্ট্ৰেলিয়াত এগৰাকী কঠোৰ নাৰীবাদী হিচাপে পৰিচিত চেলি গ্ৰ’ভাৰ। যৌনতা, তেওঁৰ মতে, এক অপৰিৱৰ্তনীয় জৈৱিক বিষয়। শৰীৰত অস্ত্ৰোপচাৰ কৰি লিংগ সলনি কৰিলে বাহ্যিক ৰূপহে সলনি হয়।

কিন্তু এই যুক্তি অষ্ট্ৰেলিয়াৰ ফেডাৰেল আদালতত থিয় নৰজিল। ন্যায়াধীশ ৰবাৰ্ট ব্ৰুমৱিচে কয় যে লিংগ পৰিচয় সুৰক্ষা আইন অনুসৰি ৰক্সান টিকেলক তেওঁৰ পৰিচয়ৰ বিষয়ে বাৰে বাৰে হাৰাশাস্তি কৰা হৈছে। অষ্ট্ৰেলিয়াৰ ৰূপান্তৰকামীৰ সপক্ষে ৰায় দি এপ কৰ্তৃপক্ষক গোচৰকাৰীক ৮ লাখ ৪০ হাজাৰ টকাৰ জৰিমনা দিয়াৰ নিৰ্দেশ দিয়ে।

লগতে পঢ়কঃ হাতীৰ মৃত্যুৰ গোচৰত নুমলীগড় শোধনাগাৰ লিমিটেডৰ মুখ্য প্ৰবন্ধকৰ জামিন নাকচ আদালতৰ

অষ্ট্ৰেলিয়াৰ আদালতৰ এই সিদ্ধান্তক নিজৰ লিংগ পৰিচয় আৰু যৌন পৰিচয়ৰ বাবে যুঁজি থকা হাজাৰ হাজাৰ ৰূপান্তৰকামীৰ বাবে তাৎপৰ্যপূৰ্ণ বুলি বিবেচিত হৈছে। নিৰ্দিষ্ট শৌচাগাৰ, জিৰণিগৃহ আৰু ৰূপান্তৰকামীৰ বাবে সামগ্ৰিক সুৰক্ষাৰ বিষয়ে সৰৱ হোৱাসকলৰ বাবে এইটো নিঃসন্দেহে এক ডাঙৰ জয়।