আদালতে নিজাববীয়া গোচৰ লোৱা এপিএছ-এচিএছ বিষয়াক চাকৰিৰ পৰা বৰ্খাস্ত কৰক- ডি ৱাই এফ আই

এপিছচি কেলেংকাৰিত অভিযুক্ত সকলক ৰক্ষণাবেক্ষণ দিয়াৰ বাবে মুখ্যমন্ত্ৰী হিমন্ত বিশ্ব শৰ্মা আৰু অসম চৰকাৰে নিৰ্লজ্জভাৱে গ্ৰহণ কৰি অহা স্থিতিত আমি স্তম্ভিত হৈছো। এছ আই টি গঠনৰ মাজেৰে কেনেকৈ গোটেই প্ৰক্ৰিয়াটো দীঘলীয়া কৰাৰ লগতে অভিযুক্তক বচোৱাৰ চেষ্টা চলোৱা হৈছে সেয়া আদালতে লোৱা পদক্ষেপতে প্ৰমাণিত হৈছে।

আদালতে দোষী সাব্যস্ত কৰাৰ পিছতো ২৬ জন কৃষি উন্নয়ন বিষয়াক চাকৰিৰ পৰা বৰ্খাস্ত নকৰি জামিন লোৱাৰ সুযোগ কৰি দিছে। জামিন পোৱাৰ ক্ষেত্ৰত চৰকাৰী অধিবক্তাই কি ভুমিকা ল’ব পাৰে সেয়া জিংকি মিলিৰ ভুৱা ট্ৰেডিং গোচৰত প্ৰমাণিত হৈছে।

ডি ৱাই এফ আইয়ে দাবী কৰিছে ন্যায়াধীশ বিপ্লৱ কুমাৰ শৰ্মা আয়োগে দোষী সাব্যস্ত কৰা আৰু আদালতে নিজাববীয়াকৈ গোচৰ লোৱা পিছত কোনো পলম নকৰাকৈ বিষয়াসকলক বৰ্খাস্ত কৰক। এপিএছ নৱনীতা শৰ্মা, অসীমা কলিতা, অমৃতৰাজ চৌধুৰী, ঋতুৰাজ দলে আৰু স্বৰূপ কুমাৰ ভট্টাচাৰ্য,
এচিছ- নন্দিতা হাজৰিকা ত্ৰিদীপ ৰয়, জগদীশ ব্ৰহ্ম আৰু বিক্ৰম আদিত্য বৰা বৰ্খাস্ত কৰি দুৰ্নীতিৰ বিৰুদ্ধে শূন্য সহনশীল নীতিৰ পৰিচয় দিয়ক। ইতিমধ্যে আমি দেখিছোঁ মুখ্যমন্ত্ৰীয়ে নিযুক্তিৰ ক্ষেত্ৰতো স্বৈৰাচাৰী মনোভাৱেৰে কেৱল নিজৰ প্ৰাৰ্থীকহে নিযুক্তি দিছে।

জনস্বাস্থ্য বিভাগত ১০১ প্ৰাৰ্থীক লিখিত পৰীক্ষা অবিহনেই নিযুক্তি দিছে। অসম সচিবালয়ত বিজ্ঞাপন অবিহনেই বহু নিজৰ প্ৰাৰ্থীক নিযুক্তি দিছে। এই ক্ষেত্ৰত তেওঁলোকে বিশেষ কৌশল গ্ৰহণ কৰিছে। প্ৰথমতে ঠিকা ভিত্তিক নিযুক্তি দি ইয়াৰ কেইমাহমান পিছতে অভিজ্ঞতাৰ ভিত্তিত প্ৰাৰ্থী নিযুক্তি দিয়ে। এয়া অসম যুৱক-যুৱতীৰ প্ৰতি চৰম অন্যায়।

এই অন্যায়ৰ বিৰুদ্ধে আৰু আদালতে দোষী সাব্যস্ত কৰা তথা আদালতত বিচাৰাধীন হৈ থকা অভিযুক্তক চৰকাৰে ৰক্ষণাবেক্ষণ দিয়াৰ প্ৰতিবাদত শীঘ্ৰে ডি ৱাই এফ আইয়ে গুৱাহাটীত প্ৰতিবাদী কাৰ্যসূচী গ্ৰহণ কৰিব। ইয়াৰ লগে লগে ৰাজ্যৰ অন্য প্ৰান্ততো নিযুক্তি কেলেংকাৰিত অভিযুক্তক সুৰক্ষা দিয়া কাৰ্যৰ বিৰুদ্ধে প্ৰচাৰ আৰু প্ৰতিবাদ কৰা হ’ব।