প্ৰধানমন্ত্ৰী মোদীয়ে দান কৰা দেৱী কালীৰ সোণৰ প্ৰলেপযুক্ত মুকুট চুৰি!

বাংলাদেশৰ সাতখিৰাৰ যশোৰেশ্বৰী মন্দিৰত প্ৰধানমন্ত্ৰী নৰেন্দ্ৰ মোদীয়ে উপহাৰ দিয়া দেৱী কালীৰ মুকুট চুৰি হোৱা বুলি বাতৰি প্ৰকাশ পাইছে।

দিনটোৰ পূজাৰ পিছত মন্দিৰৰ পুৰোহিতজনে যোৱাৰ কিছু সময়ৰ পাছতে বৃহস্পতিবাৰে বিয়লি মুকুটটো চুৰি হয়। বাংলাদেশৰ বাতৰি কাকত দ্য ডেইলী ষ্টাৰত প্ৰকাশিত বাতৰি অনুসৰি, চাফাই কৰ্মীসকলে দেৱতাৰ মূৰৰ পৰা মুকুটটো নোহোৱা হোৱা বুলি আৱিষ্কাৰ কৰে।

প্ৰধানমন্ত্ৰী মোদীয়ে ২০২১ চনৰ মাৰ্চ মাহত, বাংলাদেশ ভ্ৰমণৰ সময়ত যশোৰেশ্বৰী মন্দিৰক এই মুকুট প্ৰদান কৰিছিল।

প্ৰজন্মৰ পিছত প্ৰজন্ম ধৰি মন্দিৰটো চোৱা-চিতা কৰি অহা পৰিয়ালটোৰ সদস্য জ্যোতি চট্টোপাধ্যায়ে বাংলাদেশী সংবাদ মাধ্যমৰ আগত কয় যে এই মুকুটটো ৰূপৰ আৰু সোণৰ লেপ দিয়া হৈছে।

চুৰি হোৱা মুকুটটোৱে ভক্তসকলৰ বাবে সাংস্কৃতিক আৰু ধৰ্মীয় তাৎপৰ্য বহন কৰে। হিন্দু পৌৰাণিক কাহিনীত যশোৰেশ্বৰী মন্দিৰক সমগ্ৰ ভাৰত আৰু চুবুৰীয়া দেশত বিস্তৃত ৫১ টা শক্তি পীঠৰ ভিতৰত অন্যতম হিচাপে শ্ৰদ্ধা কৰা হয়।

সাতখিৰাৰ ঈশ্বৰীপুৰত অৱস্থিত এই মন্দিৰটো দ্বাদশ শতিকাৰ শেষৰ ফালে আনৰি নামৰ এজন ব্ৰাহ্মণে নিৰ্মাণ কৰা বুলি ধাৰণা কৰা হয়। তেওঁ যশোৰেশ্বৰী পীঠৰ বাবে ১০০ দুৱাৰেৰে মন্দিৰটো নিৰ্মাণ কৰিছিল। পৰৱৰ্তী সময়ত ত্ৰয়োদশ শতিকাত লক্ষ্মণ সেনে ইয়াৰ সংস্কাৰ সাধন কৰে আৰু শেষত ষোড়শ শতিকাত ৰজা প্ৰতাপদিত্যই মন্দিৰটো পুনৰ নিৰ্মাণ কৰে।